མེ་ལོང་ཆག་ཤུལ་དུ་རང་ཉིད་འཚོལ་བ།
ལང་ཚོ་དང་མེ་ལོང་ཆག་སོང་བའི་ཤུལ་དུ
སྙིང་ཉེ་བའི་རྨི་ལམ་གྱི་སྣེ་རུ
བྱིས་དུས་ཀྱི་དྲན་ཞིང་དམར་པོར་སྒུལ་བར་བྱེད་པའི་གླུ་ངག་ཡོད་ལ
བྱིས་དུས་ཀྱི་རྩེད་ར་བསྐྱར་དུ་འཛུགས་པའི་ར་མ་རུས་ཅག་གི་མེ་ཏོག་ཡོད
བྱིས་དུས་ཀྱི་སེམས་པ་དྲོད་ཀྱིས་བསྐྱངས་པའི་མ་སྐད་དྭངས་མ་དེ་ཡང་གྲགས་ཀྱིན་ན
རྩྭ་ཐང་དང་སྦྲ་ཁྱིམ་ནས་ཡོང་བའི་སེམས་པ་འདིའི་ཕྱི་ནང་དྲོད་ཀྱིས་འཁྱིལ་ཡོད་པས
ལང་ཚོ་དང་མེ་ལོང་ཆག་སོང་བའི་ཤུལ་དུ
མཛེས་སྡུག་ལྡན་པའི་རྨི་ལམ་གྱི་ཁང་ཁྱིམ་ལྷག་ཏུ་མཛེས
བར་ཐག་ནི་རེག་བྱ་མེད་པའི་མཛེས་སྡུག་གི་མཇའ་ཚོན་ཞིག་ཡིན་ན
མི་ལ་ལས་དེ་ནི་བསླུ་བྲིད་ཀྱི་གཏམ་རྒྱུད་ཅིག་ཏུ་ཤོད
དྲ་སྣང་ནི་ཉལ་ས་མེད་པའི་སྟོང་སྣང་གི་ཁང་ཁྱིམ་གོར་མོ་ཞིག་ཡིན་པས
མི་ལ་ལས་དེ་ནི་ཆོ་འཕྲུལ་གྱི་གོ་རིམ་ཞིག་ཏུ་བརྩི
ཕྱོགས་ལྷུང་དང་འདྲ་མཉམ་མིན་པའི་ལྟ་ཚུལ་འདི་ལྟར་ན
འཆི་བ་ཡང་ང་ཚོ་དང་ཐག་ཉེ་སར་ཡོད་པ་མ་ཡིན་ནམ
ཚེ་སྲོག་ཀྱང་སྟོང་སྣང་གི་འཆར་ཡན་ཐེངས་གཅིག་མ་རེད་དམ
ལང་ཚོ་དང་མེ་ལོང་ཆག་ཤུལ་དུ
བར་ཐག་དང་དྲ་སྣང་གི་སྣེ་མོ་རུ
ངས་བསྐྱར་དུ་ཚེ་སྲོག་འདི་ཚོན་མདོག་སྔོན་པོས་འབྲི་བའི་་སྤྲོ་བ་ཞིག་རྙེད་ཅིང་
ངས་འཚོ་བ་ལ་ཁ་དོག་དམར་པོ་བྱུགས་པའི་མཛེས་སྡུག་ཅིག་རྙེད
ལང་ཚོ་དང་མེ་ལོང་ཆག་སོང་བའི་ཤུལ་དུ
གྲོང་ཁྱེར་དང་ཟང་ཟིང་གི་འཚོ་བས་ཚིམས་པར་བྱུང་ཡང་།
ང་ལ་ད་དུང་ཕ་ཡུལ་བོར་བའི་གཏམ་རྒྱུད་ཅིག་གི་སྐྱོར་གར་ཡོད་ལ
འདང་བརྩེ་ཞེས་པའི་མིང་ཚིག་ཅིག་གི་སྤྲང་བོ་ཡང་ཡིན་ན
དྲ་སྣང་གི་ཀློང་ཡངས་པོ་ནས
ཤ་དང་མཆིན་པར་བདེ་སྣང་སྟེར་བའི་ཐ་སྙད་དང་ཚིག་རུས་སྒྲིག་པ
མཁའ་འགྲོའི་ཚོགས་ཞིང་དུ་ལོངས་སྤྱོད་ཀྱི་མངའ་ཐང་དར་འདྲའི་སྤྲོ་སྣང་འདྲེན་ཐུབ
མེ་ལོང་དང་ལང་ཚོ་ཆག་སོང་བའི་ཤུལ་དུ
སྙིང་ཉེ་བའི་རྨི་ལམ་གྱི་སྣེ་རུ
རྐང་གླིང་གི་དབྱངས་རྟ་རི་ཚོགས་ཀྱི་ཕར་ནང་ནས་ང་ཡི་རྣ་སྒོར་ཡོང་གིན་ལ
ཨ་མྱེས་ཀྱི་གཏམ་རྒྱུད་ཀྱང་ལེའུ་རེ་རེ་བྱེད་དེ་བསལ་ཞིང་དྭངས་པས་བསྒྲགས་ཀྱིན་ན
གློག་དམར་འཁྱུག་ཤུལ་དང་། དྲག་ཆར་འབབ་ཤུལ་དུ། རླུང་བུ་གཡུག་ཤུལ་དུ།
ད་དུང་མེ་ལོང་དང་ལང་ཚོ་ཆག་སོང་བའི་ཤུལ་དུ
ངས་དྲ་སྣང་དང་རྨི་ལམ་གྱིས་བར་སྣང་དུ།
བདེ་སྐྱིད་ཀྱི་ལོངས་སྤྱོད་དེར་ཆོག་ཤེས་ཀྱིས་མཆོད་པ་གཙང་གཞེས་གནང་གིན་ཡོད
ཆུ་མིག་གི་བཞུར་རྒྱུན། 