当下着雨,当念着你

Published ཟླ་བརྒྱད་པ། 25, 2014 by Tsering kyi

935429_462552307165140_412977789_n这座城市面无表情,如此残酷,如此冷漠
当天空着雨,独自对着玻璃窗如此想念你时
想念的存在,痛苦的忍受
甚至像垂死挣扎的过程
无法胜过遥远的你。

对着玻璃窗,我的眼睛里充满了雾
黑暗迷住了我的白天
我住在黑暗里
永远紧张,满是愤怒。

因为你的离去,我想离开
想要离开这座城市,尽力隐藏悲伤。
情绪犹如肮脏的气味
周围的一切一片沉寂
想起了冷淡处理的过程
想起了热切的灵魂残杀的过程
感受到了原本的忽略

我听不清雨滴
看不清彩虹
我的眼睛在阴霾中
我的耳朵已麻木
我的灵魂在神秘的迷宫里
尽管我多么努力地尝试离开你
但我的灵魂逃不了你的怀抱

这座城市面无表情,残酷,冷漠
当下着雨,当念着你

 

 

Advertisements

བྱུ་རུའི་སྐྲ་འཛར། ༼འཕྲོས༽

Published ཟླ་བདུན་པ། 3, 2014 by Tsering kyi

ཚེ་དབྱངས་ཀྱིས་ཁང་མིག་གི་ཕྱེད་ཀ་ཤེལ་གྱི་བཟོ་བཀོད་ལས་གྲུབ་པའི་ངོས་ཀྱི་དྲ་ཡོལ་ཕར་འདེད་ཚུར་འདེད་ཙམ་བྱས་ཏེ།  མིག་གིས་ནེའུ་ཡོག་གྲོང་ཁྱེར་གྱི་བྲག་རོང་ལྟ་བུའི་ཁང་བརྩེགས་ཀྱི་ཐང་ཆེན་ལ་ཕྱོགས་ནས་བརྗོད་རྒྱུར། (ངས་ད་ལྟའི་བར་དུ་སུ་ཞིག་གི་བཅར་འདྲི་དང་ལེན་བྱེད་མ་མྱོང་ལ། སུ་ཞིག་ལ་ཡང་ཉིན་མཚན་ཁ་ཤས་ལ་ཕྱིར་དྲན་བྱས་ཏེ་བརྒྱུད་ཟིན་པའི་མི་ཚེ་བཤུལ་ལམ་དེ་བརྗོད་འདོད་ཀྱི་གྲ་སྒྲིག་བྱས་མ་མྱོང་། ངས་རང་གིས་བརྒྱུད་པའི་མི་ཚེའི་གཏམ་རྒྱུད་དེར་ཁ་དོག་སྦྱོར་ན་མི་འདོད་ལ། གལ་ཏེ་བཤད་དགོས་ན་བདེན་པ་དང་དྲང་པོ་དེ་བཤད་ན་འདོད། ཡིན་ན་ཡང་ཁྱེད་ཀྱིས་ཤེས་གསལ་ལྟར་བུད་མེད་ཅིག་དང་ལྷག་དོན་དུ་བོད་ཀྱི་སྤྱི་ཚོགས་ལ་མཚོན་ན་སྐད་ཆ་བདེན་པ་ནི་བུད་མེད་ཀྱི་མི་ཚེ་ཧྲིལ་བོའི་རིན་ཐང་དང་འབྲེལ་བ་ཆགས་ཡོད་པས། སྐད་ཆ་བདེན་པར་ཉན་མི་ཤེས་པའི་མི་ཚོའི་མིག་མདུན་ལ་རང་ཉིད་གོང་ཆུང་དུ་བཟོས་པ་ལས་མེད་པས། ངས་ད་ལྟ་བར་དུ་ངག་བསྡམས་ནས་ཡོད།) ངས་ལན་ཅི་ཞིག་འདེབས་དགོས་མིན་མ་ཤེས་པར་ཚེ་དབྱངས་ཀྱི་ལྟག་རྒྱབ་ལ་ཅེར་ནས་བསྡད་སྐབས། ཁོ་མོས་ཧ་ཅང་རྣོ་བའི་མིག་ཟུང་གིས་ང་ལ་ཅེར་བཞིན། (བུད་མེད་ལ་མཚོན་ན་གསང་བ་ལྐོག་གྱུར་ནི་མི་ཚོས་མཛེས་སྡུག་ལ་ལྟ་བའི་ལུགས་སྲོལ་ཡོད་པ་ལྟར། བདེན་པ་ནི་ནམ་ཡང་ནུས་མེད་ཡིན་པ་ཁྱེད་ཀྱིས་ཀྱང་ཤེས་ངེས་པ་རེད། )ཅེས་བརྗོད་བྱུང་།

ཚེ་དབྱངས་ནི་རིག་གནས་གསར་བརྗེ་བོད་ཁམས་སུ་འབྱུང་བཞིན་པའི་སྐབས་སུ་མདོ་ཁམས་མི་ཉག་ཕྱོགས་ཀྱི་འབྲོག་ཁྱིམ་ཞིག་ཏུ་སྐྱེས་ཤིང་། ཁོ་མོ་སྐྱེས་ཏེ་ཟླ་གཅིག་ལས་མ་སོང་བའི་སྐབས་སུ། འབྲོག་སྡེ་དེའི་འཐབ་རྩོད་རུ་ཁག་གིས་ཁོང་ཚང་གི་དུད་ཁྱིམ་ཡོད་སར་དུ་བ་བར་སྣང་ལ་མཆེད་པ་མཐོང་ནས་གསང་བསོལ་བྱེད་པའི་ཉེས་སྐྱོན་འོག སྐབས་དེར་ལོ་ན་༣༠ལས་བརྒལ་མ་ཐག་པའི་ཚེ་དབྱངས་ཀྱི་ཨ་ཕར་འཐབ་རྩོད་བྱས་པ་དང་། མཐར་ཁོང་ལ་གསང་གསོལ་ནི་རྨོངས་དད་དང་རྙིང་ཞེན་ཡིན་པ་དང་། བསང་གསོལ་དང་མཆོད་འབུལ་ནི་གསར་བརྗེ་ལ་ངོ་ལོག་བྱེད་པའི་བྱ་སྤྱོད་ཡིན་པ་མང་ཚོགས་ཀྱི་མདུན་ནས་ངོས་ལེན་གཏམ་བཤད་བྱ་དགོས་པ་མ་ཟད། མ་ཎི་བཏོན་པར་འཐབ་རྩོད་བྱེད་སའི་སྡེ་བའི་རྒན་རྒོན་ཁག་ཅིག་ལ་འཐབ་རྩོད་བྱ་དགོས་པའི་བཙན་དཀའ་བཏང་བ་སོགས། མཐར་ཚེ་དབྱངས་ཀྱི་ཨ་ཕས་རང་སྲོག་རང་གིས་བཅད་དེ་དགོང་མོ་དེ་ནས་ཁྱིམ་དུ་ཕྱིར་ལོག་མེད་པ་ཚེ་དབྱངས་ཀྱི་ཨ་མའི་ངག་རྒྱུན་ལས་གོ་བ་དང་། དེ་ནས་བཟུང་ཚེ་དབྱངས་ཀྱི་་ཨ་མས་རྟ་ཟོག་སེམས་ཅན་འཚོ་སྐྱོང་གི་ཞོར་དུ་ཚེ་དབྱངས་གཉོར་སྐྱོང་བྱས་ཏེ་བསྐྱར་དུ་གནས་ལ་མ་སོང་བར་ཁེར་འདུག་བྱས་ཡོད་འདུག   ཚེ་དབྱངས་ཀྱིས་བསམ་ཤེས་ཐུབ་པ་ནས། མཚན་མོ་རེ་རེར་སྒོ་ཁྱིའི་ཟུག་སྐད་དང་ཨ་མའི་ངུ་ཤུམ་ནི་རང་གི་ལང་ཚོ་ལ་འགྲོགས་པའི་སྐྱོ་གདུང་གི་གླུ་དབྱངས་ཤིག་དང་འདྲ་འདུག  ཚེ་དབྱངས་ཀྱིས་ལོ་ན་༤༠བརྒལ་ཙམ་གྱི་རང་གི་ཨ་མ་ནི་ལོ་༦༠ལས་བརྒལ་བའི་རྒན་མོ་ཞིག་གི་རྣམ་པ་མངོན་པ་མཐོང་ཞིང་། དཀའ་ཚེགས་ཀྱི་ལོ་ཟླས་ཁེར་འདུག་གིས་གཉོར་སྐྱོང་གནང་བའི་ཚེ་དབྱངས་གཉོམ་ལོག་རྒྱས་ཏེ་ལང་ཚོ་སྨིན་པ་དང་ཨ་མའི་ལང་ཚོ་ཚེ་དབྱངས་ཀྱིས་འཕྲོག་པ་ལྟར་ཨ་མ་ནི་ཉིན་རེ་ནས་ཉིན་རེར་རྒུད་ཅིང་གང་ཡིན་མི་ཤེས་པའི་ནད་ཀྱིས་མནར་བ་སོགས། མཐར་ཚེ་དབྱངས་མོ་ལོ་༡༤ལ་སོན་སྐབས། ཨ་མའི་རེ་བ་དངམཉམ་དུ་འབྲོག་སྡེ་དེའི་ཁྱིམ་མི་འགའ་ཞིག་ལ་འགྲོགས་ནས་སྟོད་ཉི་མ་ལྷ་སའི་ཇོ་བོར་མཇལ་དུ་ལམ་ལ་ཆས་འདུག ཨ་མའི་རེ་བ་ལྟར་དུ། ཚེ་འདིར་རང་གི་ཁྱོ་བོའི་རྣམ་ཤེས་དང་འགྲོགས་ནས་ཉི་མ་ལྷ་སའི་ཇོ་བོར་ཐེངས་གཅིག་མཇལ་རྒྱུ་ནི་ཚེ་འདིའི་མཐར་ཐུག་གི་འདོད་བློ་ཡིན་པ་ལྟར། ཚེ་དབྱངས་དང་ཨ་མ་གྲོས་བྱས་ཏེ་སྒོ་ཕྱུག་སེམས་ཅན་རྣམས་བཙོངས་པའི་དངུལ་རྣམས་ཁྱེར་ནས་སྟོད་ཉི་མ་ལྷ་སར་རྐང་ཐང་གིས་བསྙེགས་ཡོད་འདུག

ལམ་བར་ནས་ཨ་མ་ནད་ཀྱིས་མནར་ཏེ་རྐང་ཐང་དུ་འགྲོ་ཐབས་མ་བྱུང་བས། ཚེ་དབྱངས་ལོ་ན་ཆུང་བས་ཨ་མ་རྒྱབ་ལ་ཁུར་འདོད་ཀྱང་སྡེ་མི་སེམས་བཟང་ཚོས་ཚེ་དབྱངས་ལ་རོགས་བྱས་ཏེ་ཨ་མའི་གཡས་གཡོན་ནས་སྐྱོར་ཏེ་མ་བུ་གཉིས་ལམ་བར་དུ་མ་གཡུག་པར་ཟླ་ཕྱེད་ཙམ་ལ་ཡོང་བའི་དགོང་མོ་ཞིག་ལ། ཁོ་ཚོས་ན་ཐང་ཞིག་ནས་ཇ་བསྐོལ་ཏེ་ངལ་གསོ་བའི་སྐབས། གྲང་ངར་ལ་གཡོལ་ཆེད་དཔྱིད་ཀར་ལམ་ལ་ཆས་པའི་དབུས་མཇལ་བ་ཚོ་ཉིན་གང་གི་ངལ་དུབ་ཁྲོད་གཉིད་དུ་ཡུར་བ་དང་། ཚེ་དབྱངས་ཀྱང་ངལ་དུབ་ཀྱིས་མནར་ནས་གཉིད་དུ་ཡུར་བཞིན་པའི་སྐབས། གློ་བུར་དུ་ཚེ་དབྱངས་ཀྱི་ཨ་མས་ཚེ་དབྱངས་ཀྱི་མགོ་བོར་བྱིལ་བྱིལ་བྱེད་ཞོར། ཚེ་འདིར་ཁྱོ་བོའི་རྣམ་ཤེས་དང་འགྲོགས་ནས་ཇོ་བོར་མཇལ་བར་བསོད་ནམས་མེད་པ་དང་། ཚེ་དབྱངས་ཀྱིས་ཕ་མའི་རྣམ་ཤེས་དང་མཉམ་དུ་དབུས་ཇོ་བོར་མཇལ་བའི་ངག་གདམས་སོགས་གནང་ཞོར་དགོང་མོ་དེར་ཚེ་དབྱངས་ཀྱི་ཨ་མ་གཏན་དུ་འཇིག་རྟེན་དང་ཁ་བྲལ་འདུག སྡེ་མི་སེམས་བཟང་ཚོས་ཨ་མའི་ཕུང་བོ་དུར་འཇུག་བྱས་པ་དང་། ཁོ་མོས་ཀྱང་ཨ་མའི་ངག་གདམས་དང་མཐོང་མ་མྱོང་བའི་ཨ་ཕའི་རྣམ་ཤེས་རང་དང་འགྲོགས་པའི་ཡིད་ཆེས་བརྟན་པོ་དང་་མཉམ་དུ་མུ་མཐུད་ནས་དབུས་ལམ་བསྙེགས་ཡོད་འདུག

ཚེ་དབྱངས་ཀྱིས་བརྗོད་ན་རང་གི་གཟུགས་གཞིའི་ནང་དུ་འདྲེས་པའི་མཐོང་མ་མྱོང་བའི་ཨ་མའི་སྣང་བརྙན་ཞིག་སེམས་སུ་བཞེངས་བསྐྲུན་བྱ་རྒྱུ་ལས་ཚེ་འདིར་ཨ་ཕའི་འདྲ་པར་ཞིག་ཀྱང་མཐོང་མྱོང་མེད་པ་དང་། ཆུང་དུས་ཨ་མ་རང་གི་ཨ་མ་ཡིན་ལ་ཨ་ཕའི་ཚབ་ཀྱང་ཡིན་པ་མ་ཟད། ཁྱིམ་གྱི་རྟེན་ས་ཁོ་ན་དང་རང་གི་རྒྱབ་རི་ཁོ་ན་དེ་ཡིན་ཡང་གློ་བུར་དུ་ཨ་མ་གཤེགས་པ་ཡིས་སེམས་སུ་གདུང་བ་དྲག་པོ་ཤིག་སྐྱེས་ཀྱང་། ཆོས་ལ་དད་པའི་སེམས་ཀྱི་ཡིད་ཆེས་བྱེད་སྟངས་ཤིག་དང་། སྡེ་མི་ཚོའི་བྱམས་སྐྱོང་དང་ལྟ་སྐྱོང་གིས་ཚེ་དབྱངས་སྔར་བཞིན་སྙིང་སྟོབས་ཆེན་པོས་མདུན་དུ་བསྐྱོད་ཡོད་འདུག 

སྟོད་ཉི་མ་ལྷ་སར་འབྱོར་ནས་དབུས་ཇོ་བོའི་གསེར་ཞལ་མཇལ་བ་དང་། ལྷ་སའི་མཐའ་སྐོར་གྱི་གནས་ཆེན་དགོན་ཆེན་ཧྲིལ་བོར་ཕྱག་མཆོད་འབུལ་གྲུབ་སྟེ་ཕྱིར་ཕ་ཡུལ་ལ་ལོག་འགྲོ་བའི་ཉིན་ཤས་སྔོན་ལ། དབུས་རོགས་སྡེ་མི་ཚོས་གྲོས་མོལ་བྱས་ཏེ་ཚེ་དབྱངས་ཕྱིར་ཕ་ཡུལ་དུ་སོང་ཡང་། ཁྱིམ་དུ་ཆགས་ས་རྟེན་ས་གང་ཡང་མེད་པ་དང་། ད་དུང་ལོ་ན་ཡང་ཆུང་ཆུང་ཡིན་པས། དབུས་ཉི་མ་ལྷ་ས་ནས་ཕ་མའི་རྣམ་ཤེས་དང་འགྲོགས་ནས་ཕྱག་མཆོད་འབུལ་བྱེད་ཞོར་འཚོ་བ་རོལ་བ་ཡིན་ན་བཟང་རབས་བཤད་པ་དང་། ཡུལ་ཕྱོགས་ཀྱི་ཚོང་བ་ཁག་ཅིག་གིས་ཀྱང་ཚེ་དབྱངས་ལ་རོགས་བྱས་ཏེ་བུ་རྫིའི་ལས་ཀ་ཞིག་བཙལ་ཡོད་འདུག

ཚེ་དབྱངས་ཀྱིས་ཀྱང་སྡེ་མི་སེམས་བཟང་ཚོའི་ཁ་ཏ་སློབ་གསོར་ཉན་ཏེ། བོད་མི་ཚོའི་སེམས་ཀྱི་དག་ཞིང་ཉི་མ་ལྷ་ས་ནས་འཚོ་བ་རོལ་ཐུབ་ན་ཕྱི་མའི་ཡུལ་གྱི་ཕ་མའི་འདོད་པ་ཡང་ཡིན་ངེས་པ་དང་། རང་ཉིད་ཀྱིས་ཀྱང་ཕ་མའི་ཆེད་དུ་སེམས་པ་ཆོས་ལ་ཕྱོགས་ཐུབ་པའི་བསམ་བློ་བཏང་ནས་མུ་མཐུད་དེ་ལྷ་སར་སྡོད་རྒྱུའི་ཐག་གཅོད་བྱས་འདུག

ཚེ་དབྱངས་ཀྱི་བུ་རྫི་བྱེད་སའི་མི་ཚང་དེ་ནི་ལྷ་སའི་གསོལ་མགྲོན་ཁང་ཞིག་གི་སྦྱིན་བདག་ཡིན་པ་དང་། སྦྱིན་བདག་མ་ནི་མདོ་སྨད་ནས་ཡོང་བའི་བུད་མེད་གཞོན་ནུ་མ་ཞིག་ཡིན་ཞིང་སྦྱིན་བདག་ནི་ཚེ་དབྱངས་ཀྱི་ཕ་ཡུལ་ཕྱོགས་ནས་ཡོང་བའི་ལོ་ན་བཞི་བཅུ་ལས་བརྒལ་ཙམ་ཞིག་ཡིན་འདུག ཚེ་དབྱངས་ཀྱི་ལས་ཀ་ནི་ལོ་དགུ་ཡིན་པའི་ཁོ་གཉིས་ཀྱི་བུ་དང་ལོ་ན་བདུན་ལ་སོན་པའི་བུ་མོ་གཉིས་ཀྱི་གྱོན་པ་བཀྲུ་རྒྱུ་དང་སྔ་དགོང་གི་ཟ་མ་བཟོ་རྒྱུ། སློབ་གྲྭར་ཕར་སྐྱེལ་ཚུར་སྐྱེལ་བྱ་རྒྱུ་བཅས་ཡིན་འདུག 

ཚེ་དབྱངས་ཀྱིས་རང་གི་མི་ཚེའི་གཏམ་རྒྱུད་བཤད་དེ་བར་མཚམས་འདིར་སླེབས་སྐབས། ངས་ཀྱང་ཁོ་མོའི་གཏམ་རྒྱུད་ལ་ཉན་ཞོར། ཡར་ལངས་ནས་ཁོ་མོའི་འཁྲིས་སུ་སོང་ཞིང་། ཡང་ཕར་སོང་ནས་འཚིག་ཇ་བཟོ་སྣོད་ནས་ཁོ་མོར་འཚིག་ཇ་ཁ་སྣོན་བྱེད་པ། ཡང་ཁོ་མོ་དང་མཉམ་དུ་མཚམས་རེར་རྒྱང་ལ་བལྟས་ཤིང་། ལན་རེར་ཁོ་མོས་བཤད་པའི་སྐད་ཆའི་བརྒྱུད་རིམ་ཁྲོད་ནས་དབུས་ལམ་ནས་ཨ་མ་འདས་གྲོངས་སུ་གྱུར་པའི་སྐོར་གྱི་སྐད་ཆ་བཤད་སྐབས་ཁོ་མོའི་མིག་ཟུང་ན་མཆི་མ་མེད་ཀྱང་། སྐད་མགོ་ཇེ་དམའ་དང་སྐད་ངག་འདར་བཞིན་པ་སོགས། ཚེ་དབྱངས་ཀྱིས་རང་གི་སྐྱོ་བའི་མི་ཚེ་དེ་མིག་ཆུ་མེད་པར་བཤད་བཞིན་ཡོད་ཀྱང་། ངའི་སྣ་ཤ་ལ་ཚ་བེར་བེར་གྱི་ཚོར་བ་ཡང་ཡང་དུ་སྐྱེས་པ་མ་ཟད། ད་དུང་མིག་ཀོང་ལ་མཆི་མ་ཡང་ཡང་འཁྱིལ་བྱུང་སྟེ། དེ་ནི་གཅིག་བྱས་ན་ངས་ཀྱང་རང་གི་ཕ་མ་གཉིས་དྲན་པ་དང་། ཕ་མ་གཉིས་དང་མཉམ་དུ་བྱིས་དུས་སྟོད་ཉི་མ་ལྷ་སར་ཆས་པ་སོགས་ཡིད་ལ་འཁོར་བས་ཡིན་སྲིད།

ངས་སྒང་ནས་བྲིས་པའི་ཚེ་དབྱངས་ཀྱི་གཏམ་རྒྱུད་མདོར་འབྲི་བྱེད་པ་ནི་ཚེ་དབྱངས་ཀྱི་མི་ཚེ་ལ་འགྱུར་བ་དངོས་སུ་བྱུང་བའི་བརྒྱུད་རིམ་ངོ་མཚར་ཅན་དེ་ད་དུང་རྗེས་སུ་ཡོད་པས་ཡིན། ངས་ཕྱིར་དྲན་བྱེད་པ་ལས། ཚེ་དབྱངས་ཀྱིས་གཏམ་རྒྱུད་བཤད་དེ་འདིར་སླེབས་སྐབས། ཁོ་མོས་ལག་ནང་གི་འཚིག་ཇ་བཏུང་ཆས་ཕར་བཞག་སྟེ། ངའི་ལག་ཟུང་ནས་འཇུས་ཏེ། (ཁྱེད་ལ་དེ་རིང་དང་སང་ཉིན་ཉིན་གཉིས་རིང་ངའི་གཏམ་རྒྱུད་ཉན་ཁོམ་ཡོད་པས། ངས་ཁྱེད་ལ་ག་ལེར་བཤད་ཆོག དུས་ཚོད་ཀྱང་སྔ་རྒྱུ་མེད་པས། འུ་གཉིས་ཁང་བའི་ཀླད་ཁེབས་སུ་ཡོད་པའི་ཚ་ཆུའི་ནང་དུ་ངལ་གསོ་བྱ་བར་འགྲོ) ཞེས་བརྗོད་པ་དང་། ཁོ་མོས་ཁ་པར་ལེན་ཞོར་ང་ལ་དགོངས་པ་མ་ཚོམ་ཟེར་ཞོར། མི་ཞིག་དང་གླེང་མོལ་སྐར་ཆ་ཁ་ཤས་ཙམ་བྱས་བྱུང་། ཁོ་མོའི་དབྱིན་སྐད་ཀྱི་སྒྲ་གསལ་ཞིང་དག་ལ་ཕར་བལྟས་ན་མི་ཞིག་ཚུར་མགྲོན་ཁང་འདིར་ཡོང་བར་དུས་ཚོད་ཅིག་བཟོ་བཞིན་འདུག

མགྲོན་ཁང་གི་ཀླད་ཁེབས་སུ་ཆུ་རྫིང་དབྱིབས་མི་འདྲ་བ་མང་ཞིང་། མཐའ་ཚང་མ་ཤེལ་གྱིས་གྲུབ་པ་དང་ཀླད་ཁེབས་སྟོང་པ་ཡིན་པས་ཐད་ཀར་ཤེལ་སོགས་ཀྱིས་མ་བསྒྲིབས་པར་ནམ་མཁའ་མཐོང་ཐུབ། ཚེ་དབྱངས་ཀྱིས་ངོ་ཚ་དང་འཛེམ་ཟོན་མེད་པར་བྱང་ཆ་ཡོད་པའི་ཐོག་ནས་གྱོན་པ་རྣམས་ཕུད་དེ་ཆུ་རྫིང་ལ་འཛུལ་བྱུང་ལ། ཁོ་མོའི་གཟུགས་སྐྱེས་ནི་ངས་གྱོན་པའི་ཕྱི་ཁེབས་ནས་ཚོད་དཔག་བྱས་པ་ལྟར་དུ་ཕྲ་ས་ཕྲ་ཞིང་སྦོམ་ས་སྦོམ་པ། དེ་ལས་ཀྱང་བདེ་ཐང་གི་ཤ་མདོག་སོགས། མདོར་ན་ང་བུ་མོ་ཞིག་ཡིན་ཡང་ཡིད་སེམས་འཕྲོག་པ་ཞིག་འདུག ང་ཡང་འཚེར་འཚེར་འཛེམས་འཛེམས་གྱིས་ཁོ་མོའི་རྗེས་དེད་ནས་ཆུ་རྫིང་དུ་འཛུལ་བ་ཡིན། ངེད་གཉིས་འཛུལ་སའི་ཆུ་རྫིང་དེར་མི་གཞན་མི་འདུག་ལ། འཁྲིས་ཀྱི་ཆུ་རྫིང་དེ་དག་ཏུ། ལོ་ན་རྒན་གཞོན་འདྲ་མིན་དང་སྐྲ་ལོ་སེར་ནག་འདྲ་མིན་ཁྱུ་དང་ཁྱུ་བྱས་ཏེ་ཤེལ་ཕོར་དབྱིབས་འདྲ་མིན་ནང་དུ་ཁ་དོག་མི་འདྲ་བའི་བཏུང་བྱ་འདྲ་མིན་ལག་ཏུ་བཟུང་ནས་སྐད་ངག་དམའ་མོས་གླེང་མོལ་བྱེད་ཞིན་འདུག རྗེས་སུ་ཤེས་དུས་ངེད་གཉིས་འཛུལ་སའི་ཆུ་རྫིང་དེ་ཚེ་དབྱངས་ཀྱིས་སྔ་མོ་ནས་ཉིན་ཧྲིལ་བོར་གླས་ཡོད་པ་དང་། ངེད་གཉིས་ཆུ་རྫིང་དུ་འཛུལ་ནས་སྐར་མ་ཁ་ཤས་རྗེས་སུ་མགྲོན་ཁང་གི་ལས་མིས་་སིལ་ཁུ་དང་ཤིང་ཏོག རྒུན་ཆང་གི་བཏུང་བ་སོགས་ཁྱེར་ནས་ཐོན་བྱུང་། ཆུ་རྫིང་དེ་ནི་ཆུ་ལྷོག་ལྷོག་ཏུ་འཁོལ་བཞིན་པ་ལྟར་ལུས་ཧྲིལ་བོར་ཆུ་ཡིས་བསྐུ་མཉེད་བྱེད་བཞིན་པ་དང་འདྲ་ལ། ནམ་མཁར་ལྟ་བཞིན་མཁའ་དབུགས་རྔུབ་ཐུབ་པ་སོགས་་ངོ་མ་སྣང་བ་སྐྱིད་པོ་ཞིག་རེད།

ངས་ཚེ་དབྱངས་ལ་ཁྱེད་ཀྱིས་བུ་རྫི་བྱེད་སའི་ཁྱིམ་ཚང་དེ་ནས་དཀའ་ལས་འདྲ་མྱངས་བྱུང་ངམ། ཞེས་དྲིས་པ་ན། ཚེ་དབྱངས་དགོད་ཙམ་གྱིས་ང་ལ་ལྟ་ཞོར། ལག་ཟུང་གིས་མར་ལྷོད་ནས་ཡོད་པའི་ངའི་སྐྲ་ལོ་རྣམས་མགོ་བོའི་ལྟག་རྒྱབ་ཏུ་ཁོ་མོའི་སྐྲ་ལོ་ལྟར་བཟོས་རྗེས། ཆུ་ཚ་བོའི་ནང་དུ་སྐྲ་ལོ་བརླན་ན་མི་བཟང་ཟེར་ལ། ཡང་ཁོ་མོས་མདུན་ཀྱི་དབུགས་སྒང་གི་རྣམ་པའི་མདུན་ཅོག་ལྟ་བུ་བཟོས་ཡོད་པ་དེ་ཆུ་ཁར་གཡེང་བཞིན་པའི་སྟེང་དུ་བཏུང་བྱ་སྣ་ཚོགས་ཡོད་པ་ལས། རྒུན་ཆང་དམར་པོ་ཞིག་ཚུར་ལེན་ཞོར། བསྐྱར་དུ་ང་ལ་གཏམ་རྒྱུད་འདི་འདྲ་ཞིག་བཤད་བྱུང་། 

ཚེ་དབྱངས་ལྷ་སར་ཡོང་བའི་ལོ་དེ་མོ་ལོ་བཅུ་བཞིར་སོན་ཙམ་ཡིན་པ་དང་།་ སྤྱི་ལོ་༡༩༨༤ལོ་རེད་འདུག ལྷ་སའི་ཕྱག་མཆོད་འབུལ་ཡོངས་རྫོགས་གྲུབ་སྟེ་སྡེ་མི་ཚོ་ཕ་ཡུལ་དུ་ལོག་པ་དང་ཚེ་དབྱངས་ཀྱིས་བུ་རྫི་བྱེད་པའི་ལས་ཀ་མགོ་འཛུག་སྐབས་ནི་དབྱར་མགོ་ཡིན་པ་རེད། ཚེ་དབྱངས་ནི་གཤིས་ཀ་འཇམ་ཞིང་།། ངང་རྒྱུད་རིང་བ། བག་ཡོད་ཚུལ་ལྡན་དང་།དྲང་པོ་དང་མངོན་ལྐོག་མེད་པ། རྫུན་དང་གཡོ་མེད་པ་སོགས་གྲོང་ཁྱེར་གྱི་ཟོག་རྫོབ་མིག་གིས་མ་མཐོང་ཞིང་། འབྲོག་པའི་རྩྭ་ཐང་ནས་དུས་བཞིའི་འགྱུར་བའི་ཁྲོད་ཀྱི་རང་བྱུང་གི་མཛེས་པ་དང་ནོར་ལུག་འཚོ་སྐྱོང་། ཨ་མའི་བྱམས་བརྩེ་དང་སྡེ་མོ་ཚོའི་ལྟ་སྐྱོང་འོག་འཚར་ལོངས་བྱུང་བ་ཡིན་པས། སྦྱིན་བདག་ཕོ་མོ་གཉིས་ཀྱིས་ཀྱང་ཚེ་དབྱངས་ཀྱིས་བྱིས་པ་གཉིས་ལ་བདག་སྐྱོང་ཡག་པོ་བྱེད་པ་དང་མཉམ་དུ། སྦྱིན་བདག་བཟའ་མི་གཉིས་ཀྱི་འཚོ་བའི་ཁྲོད་ཀྱི་ངན་གཤིས་མང་པོར་བསྒྱུར་བཅོས་བཏང་བ་སོགས་ཀྱིས་ཚེ་དབྱངས་ལ་དམིགས་བསལ་གྱིས་ནང་མི་ཞིག་གི་ཚུལ་དུ་བརྩིས་ཤིང་ཚེ་དབྱངས་ཀྱི་མ་འོངས་པའི་མི་ཚེ་སོགས་ལ་སེམས་ཚེགས་བྱས་པ་དང་། ཡང་མགྲོ་སོང་བཏང་ནས་ཚེ་དབྱངས་ལ་ཁྱིམ་དུ་རྒྱ་ཡིག་དང་བོད་ཡིག་གི་འབྲི་ཀློག་སློབ་པའི་དགེ་རྒན་གླས་པ། ད་དུང་སྦྱིན་བདག་མས་ཆེད་དུ་ཚེ་དབྱངས་ཁྲིད་དེ་རིན་གོང་མཐོ་བའི་གྱོན་ཆས་ཉོ་བ་སོགས། ཚེ་དབྱངས་ཀྱིས་སྦྱིན་བདག་ཕོ་མོ་གཉིས་ཀྱི་འཁྲིས་ནས་ནང་མིའི་བྱམས་བརྩེ་ལྟ་བུའི་ཚོར་བ་ཞིག་མྱངས་འདུག  ཚེ་དབྱངས་ཀྱིས་སྐད་ཆ་འདི་ཚོ་བཤད་སྐབས་ངོ་གདོང་དུ་འཛུམ་གྱིས་ཁེངས་ཤིང་། སྐད་ངག་ལས་ད་དུང་ཡང་སྦྱིན་བདག་བཟའ་ཚང་གཉིས་ཀྱི་བཀའ་དྲིན་དྲན་པ་ལྟ་བུའི་ཚོར་བ་སྤྲོད་ཐུབ།  ཚེ་དབྱངས་ལ་མཐོ་སྒང་གི་འབྲོག་མོ་རྫི་གླུ་ལེན་མཁན་སྤྱི་ལྟར་སྐད་ངག་བདེ་བོ་ཡོད་པ་དང་དམངས་ཁྲོད་ཀྱི་ལ་གཞས་དང་རོགས་འཐེན། ད་དུང་གླུ་སོགས་མང་པོ་ལེན་རྒྱུ་ཡོད་པས། ནམ་རྒྱུན་སྦྱིན་བདག་བཟའ་ཚང་གཉིས་ལ་སྐུ་མགྲོན་གལ་ཆེན་འདྲ་ཡོད་དུས་ཚེ་དབྱངས་ཀྱི་སྐད་ངག་ཁོ་ཚོ་ངོམས་སོ་བྱེད་པར་གོམས་འདུག  ཚེ་དབྱངས་ཀྱིས་ཁྱིམ་ཚང་དེ་རུ་བུ་རྫི་བྱས་པ་དང་ཡང་ན་གླ་བ་བྱས་ཏེ་ལོ་གསུམ་འགོར་སྐབས། བྱིས་པ་གཉིས་ཀྱིས་ཀྱང་ཁོ་མོར་ཧ་ཅང་གིས་བརྩེ་ཞིང་། ལན་རེར་ཕ་མ་ལས་ཀྱང་ཁོ་མོར་དུང་དུང་བྱེད་པ་དང་། ཡང་སྦྱིན་བདག་བཟའ་ཚང་གཉིས་ཀྱང་དེ་བཞིན་དུ་ཁྱིམ་གྱི་གནས་ཚུལ་ཅི་ཡིན་སྦ་གསང་མེད་པར་ཚེ་དབྱངས་ལ་བཤད་པ་སོགས་ལོ་ངོ་གསུམ་གྱིི་ནང་དུ་སྦྱིན་བདག་བཟའ་ཚང་གཉིས་གསོལ་མགྲོན་གསུམ་ཙམ་གྱི་སྦྱིན་བདག་ཏུ་གྱུར་འདུག 

དུས་ཚོད་ཅི་ཙམ་འགོར་བ་མི་དྲན་མོད། སྐབས་འདིར་ངས་འཕྲོ་རིམ་འཕྲོར་རྒུན་ཆང་དཀར་པོ་ཤེལ་ཕོར་གཉིས་ཙམ་བཏུང་འདུག་ལ། ཚེ་དབྱངས་ཀྱིས་ཀྱང་མུ་མཐུད་ནས་བཏུང་ཞོར་བཤད་ཞོར་བྱེད་བཞིན་འདུག  ངས་ཚེ་དབྱངས་ཀྱི་གཏམ་སྣེ་འཕྲོགས་ཏེ། ལོ་ངོ་གསུམ་གྱི་ལྷ་སའི་འཚོ་བའི་ཁྲོད་དུ་ཁྱེད་ཀྱི་བོད་ཡིག་དང་རྒྱ་ཡིག་གི་ཤེས་ཚད་གང་འདྲར་གྱུར་སོང་། འབྲོག་ཁུལ་ནས་ལྷ་སར་ཡོང་ནས་འཚོ་བར་གནམ་ས་བླ་འོག་བསྒྱུར་བ་ལྟ་བུའི་འགྱུར་བ་བྱུང་དུས། ཁྱེད་ལྷ་སའི་འཚོ་བ་ལ་ཇི་ལྟར་གོམས་ལོབས་སུ་སོང་ངམ། ཞེས་དྲིས་པ་ན། ཁོ་མོ་བསྐྱར་དུ་དགོད་ཙམ་གྱིས། ཁྱེད་རང་ལ་ཆེད་ལས་ཀྱི་ན་ཚ་ཡོད་ས་ཨེ་རེད། གཏམ་གཅིག་ཀྱང་ཤོར་དུ་མི་མཇུག་ཅེས་ཀུ་རེ་རྩོད་ཞོར་ངའི་ཕྱོགས་ལ་ཆུ་རྫིང་ལས་ལག་པ་གཅིག་གིས་ཆུ་ཡི་ཟེགས་མ་འགའ་གཏོར་བྱུང་ལ། ང་ཡང་དགོད་ཙམ་བྱེད་ཞོར་མུ་མཐུད་ནས་ཁོ་མོའི་གཏམ་རྒྱུད་ལ་ཉན་པ་ཡིན། 

སྦྱིན་བདག་ཕོ་མོ་གཉིས་ནི་ཚེ་དབྱངས་ལྟར་འབྲོག་ཁུལ་ནས་ཡོང་བ་དང་། ལྷ་སར་འཚོ་བ་རོལ་ཏེ་ལྷ་སར་གཞི་ཆགས་ཡོད་ཀྱང་། འབྲོག་པའི་བསམ་སྤྱོད་དང་ཡ་རབས་ཀྱི་གོམས་གཤིས་ཚང་བས། ཚེ་དབྱངས་ལ་འགྲོ་སྟངས་འདུག་སྟངས། སྐྱེས་གཟུགས་དང་ངོ་གདོང་ལ་གཅེས་སྤྲས་གནང་སྟངས། མི་ལ་སྐད་ཆ་བཤད་སྟངས་དང་སྲང་ལམ་ལ་འགྲོ་སྟངས། རླངས་འཁོར་སྐོར་སྟངས་དང་ཐ་ན་གྱོན་པ་གྱོན་སྟངས་ལ་སོགས་པ་བསླབས་པ་དང་། དེ་བཞིན་ཐོག་མ་ལོ་ངོ་གཉིས་ཙམ་ལ་སྦྱིན་བདག་བཟའ་ཚོ་གཉིས་ཀྱི་བཀའ་དྲིན་འོག་ཁྱིམ་དུ་དགེ་རྒན་གྱིས་བོད་ཡིག་དང་རྒྱ་ཡིག་གི་འབྲི་ཀློག་སྦྱངས་རྗེས། དེའི་རྗེས་ཉིན་སློབ་ལ་མཉམ་ཞུགས་དང་ད་དུང་བརྙན་འཕྲིན་སོགས་ལས་རྒྱ་སྐད་སྦྱང་བ་སོགས་ཀྱིས་མཐར་རྒྱ་སྐད་བཤད་ཐུབ་པ་མ་ཟད། བོད་ཡིག་གི་འབྲི་ཀློག་ལ་ཡང་དཀའ་ངལ་མེད་པར་གྱུར་པ་དང་།་གང་ཅིའི་ཐད་ནས་བསམ་ཡུལ་ལས་འདས་པ་ལྟར་དཀའ་ངལ་སོགས་གང་ཡང་མེད་པར་འཚོ་བ་བརྗེ་བསྒྱུར་དེར་ཞུགས་འདུག ཡིན་ན་ཡང་ཚེ་དབྱངས་ཀྱི་ན་ཚོད་དར་བ་དང་མཉམ་དུ་རང་གི་མི་ཚེ་ཇི་ལྟར་སྐྱེལ་མིན་དང་ཡང་ན་འཁྲིས་ཀྱི་མི་ཚོའི་བརྩེ་དུང་གི་རེ་བ་རྒྱག་སྟངས་སོགས་ཀྱིས་ཚེ་དབྱངས་ཀྱིས་ཀྱང་རང་གི་མི་ཚེ་དོན་ངོ་མ་ཇི་ལྟར་སྐྱེལ་མིན་ཐད་ལ་བསམ་བློ་གཏོང་མགོ་བཙུགས་ཡོད་འདུག 

མཚན་མོ་དེ་ནི་ཚེ་དབྱངས་་ཀྱི་མི་ཚེ་ལ་དངོས་སུ་འགྱུར་ལྡོག་བྱུང་བའི་མཚན་མོ་ཞིག་ཡིན་འདུག སྦྱིན་བདག་བཟའ་ཚང་གཉིས་དང་འགྲོགས་ནས་རྒྱུན་ལྡན་ལྟར་སྐུ་མགྲོན་གལ་ཆེན་ཁ་ཤས་ལ་ཚེ་དབྱངས་ངོ་སྤྲོད་ཞུ་སྲོལ་ཡོད་པ་ལྟར། སྦྱིན་བདག་བཟའ་ཚོ་གཉིས་ཀྱི་གསོལ་མགྲོན་ཁང་གསར་བ་ཞིག་གི་སྒོ་འབྱེད་མཛད་སྒོའི་སྟེང་དུ། ཚེ་དབྱངས་ཀྱིས་སྐུ་མགྲོན་ཚོར་འབྲོག་པའི་གླུ་ཡིས་ལེགས་སྐྱེས་ཤིག་ཕུལ་བ་དང་མཚན་མོ་དེར་པེ་ཅིན་ནས་སྲིད་གཞུང་གི་དབང་འཛིན་མི་སྣ་ཞིག་ངོ་ཤེས་པ་དང་། ཚེ་དབྱངས་ཀྱི་ལང་ཚོ་དང་སྐད་ངག་སོགས་ནི་གསོ་སྐྱོང་བྱ་འོས་པར་བསྟོད་བསྔགས་སྣ་ཚོགས་ཀྱིས། མཐར་ཚེ་དབྱངས་པེ་ཅིན་སྒྱུ་རྩལ་སློབ་གླིང་དུ་ལྟ་སྐྱོང་ཐོབ་པའི་གྲངས་ཉུང་མི་རིགས་ཀྱི་སློབ་མ་ཞེས་སློབ་ཞུགས་བྱ་རྒྱུར་རྒྱབ་སྐྱོར་བྱེད་འདུག ཚེ་དབྱངས་ཀྱིས་བརྗོད་ན་དགོང་མོ་དེར་སྦྱིན་བདག་བཟའ་ཚོ་གཉིས་ཚེ་དབྱངས་ལས་ཀྱང་དགའ་སྣང་གིས་མིག་གཞུང་ན་མཆི་མ་འདུག་ཟེར། 

ཉིན་ཤས་ལས་མ་འགོར་བར་པེ་ཅིན་སྒྱུ་རྩལ་སློབ་གླིང་གི་བརྡ་ཐོ་འབྱོར་ཞིང་། ཚེ་དབྱངས་ལོ་ན་༡༧ལ་སླེབས་ཀྱང་སློབ་གླིང་གི་སྒོ་ཐེམ་འགྲིམས་མ་མྱོང་བས། སློབ་ཆེན་ཟེར་བའི་འཚོ་བ་དང་། སྒྱུ་རྩལ་ཟེར་བའི་ཐ་སྙད་འདི་ཚོའི་སྐོར་གང་ཡང་མི་ཤེས་ཀྱང་། གང་ལྟར་སྦྱིན་བདག་བཟའ་ཚོ་གཉིས་ཀྱི་ལམ་རྫོངས་དང་། གོམས་པར་གྱུར་པའི་བྱིས་པ་གཉིས་ཀྱི་ངུ་ངག་གི་ཁྲོད་ནས་རྒྱ་ནག་གི་རྒྱལ་ས་པེ་ཅིན་དུ་ལམ་ལ་ཆས་འདུག 

སྦྱིན་བདག་བཟའ་ཚོ་གཉིས་ཀྱི་གོ་སྒྲིག་ལྟར་གནམ་གྲུ་མཐོང་མྱོང་མེད་པའི་ཚེ་དབྱངས་རིན་གོང་མཐོ་ལ་འཛིན་བྱང་རག་ཁག་པའི་གོང་དཀར་གནམ་ཐང་བརྒྱུད་དེ་པེ་ཅིན་ལ་བསྐྱོད་པ་དང་། ཚེ་དབྱངས་ཀྱི་ཚིག་གཡར་ནས་བཤད་ན། གོང་དཀར་གནམ་ཐང་ནས་པེ་ཅིན་དུ་འབྱོར་བའི་རྗེས་སུ་གཞི་ནས་ཚེ་དབྱངས་ཀྱིས་རྨི་ལམ་མ་ཡིན་པར་ཉིན་ཤས་ནང་དུ་རང་ཉིད་ལྷ་ས་ནས་པེ་ཅིན་ལ་འབྱོར་ཞིང་། དབང་འཛིན་མི་སྣ་དེའི་གོ་སྒྲིག་ལྟར་པེ་ཅིན་གྱི་གནམ་ཐང་ནས་སློབ་གྲྭར་ཕེབས་བསུ་བྱེད་མཁན། ད་དུང་སློབ་གྲྭ་དེའི་ནང་དུ་རང་ཉིད་དང་ལོ་ན་ཉམས་ཀྱང་བློ་རིག་དང་རིག་རྩལ་མ་འདྲ་བ་ལྡན་པའི་སློབ་མ་མང་བ་ཡོད་པ་སོགས་ནི་རྨི་ལམ་ལྟ་བུའི་འཁྲུལ་སྣང་ལྟ་བུ་ཞིག་ཏུ་གྱུར་ཡོད་འདུག སློབ་གྲྭའི་ནང་དུ་རང་ཉིད་ལ་སློབ་མའི་ལག་ཁྱེར་དང་ཡང་ན་སྒྱུ་རྩལ་ཆེད་ལས་ཐད་ཀྱི་མིང་ཚིག་སོགས་གང་ཅིའི་ཐད་བྱང་ཆ་གང་ཡང་མེད་པས། དོན་ངོ་མ་སློབ་ཆེན་དེ་ནས་ཅི་ཞིག་བྱ་དགོས་མིན་ལ་སེམས་ཁྲལ་ངང་ཡོད་སྐབས། དགེ་རྒན་ཁག་ཅིག་གིས། ཚེ་དབྱངས་ཀྱི་སྐད་ངག་དང་གཟུགས་བྱད་ལ་ཡིག་རྒྱུགས་ལྟ་བུ་ཞིག་བླངས་པ་དེའི་རྗེས། ཁོ་མོར་བྲོ་འཁྲབ་པའི་སློབ་ཚན་གཅིག་དང་། སྐད་ངག་སྦྱོང་བའི་སློབ་ཚན་གཉིས་གོ་སྒྲིག་བྱས་པ་དང་། གཞན་རྒྱ་ཡིག་གི་ཆུ་ཚད་མཐོར་འདེགས་གཏོང་བའི་སློབ་ཚན་ཞིག་ཀྱང་གོ་སྒྲིག་གནང་འདུག སློབ་ཁྲིད་མགོ་མ་བཙུགས་པའི་གོང་ལ། གཞུང་འཛིན་དཔོན་རིགས་དེའི་གོ་སྒྲིག་ལྟར་དུ། གནམ་ཐང་དུ་ཕེབས་བསུ་ལ་ཡོང་མཁན་གྱི་རླངས་འཁོར་ཁ་ལོ་བ་དེ་དང་མི་གཞན་ཞིག་ཡོང་ནས། ཁོ་མོ་པེ་ཅིན་གྱི་གྲོང་ཁྱེར་དུ་ལྟ་སྐོར་ལ་ཁྲིད་པ་དང་། གྱོན་ཆས་དང་སློབ་གྲྭའི་འཚོ་བའི་མཁོ་ཆས་སོགས་ཉོས་ཏེ་ཉིན་ཤས་ལ་དེ་ལྟར་པེ་ཅིན་གྱི་གནམ་གཤིས་དང་གྲོང་ཁྱེར་ལ་རྒྱུས་མངའ་ཡོད་པར་བྱས་འདུག

ཚེ་དབྱངས་ཀྱིས་བརྗོད་ན་སྐབས་དེ་དུས་ནི་རང་ཉིད་གང་ཡང་མི་ཤེས་པའི་གླེན་མ་ཞིག་དང་འདྲ་བས། མཐོང་མཐོང་རིག་རིག་ཚང་མར་འཚར་སྣང་གིས་གྲུབ་པའི་དྲི་བ་སྟོང་ཕྲག་མང་པོ་ཀླད་པར་འཁོར་ཞིང་། ཡང་ངག་རྒྱུན་གྱི་མའོ་ཙེ་ཏུང་གི་འདྲ་སྐུ་ཡོད་སའི་ཐང་ཆེན་དེ་དང་། པར་རིས་སོགས་ལས་མཐོང་བའི་ལྕགས་རི་རིང་མོ། ཚ་ཚ་འུར་འུར་དང་བྲེལ་བྲེལ་ཟིང་ཟིང་གི་མི་ཚོགས།་ཁང་བརྩེགས་དང་ནུབ་རྒྱུ་མེད་པའི་གྲོང་ཁྱེར་གྱི་གློག་གཞུ་སོགས་ཡོད་ཚད་ཀྱིས་ཚེ་དབྱངས་ལ་རང་གི་བསམ་བློ་གང་ཡང་མེད་པའི་འཚར་སྣང་ལྟ་བུ་དང་རྨི་ལམ་ལྟ་བུ། འཁྲུལ་སྣང་ལྟ་བུ་ཞིག་ཏུ་གྱུར་ཡོད་འདུག

སློབ་ཁྲིད་མགོ་བཙུགས་པ་དང་། སློབ་གྲོགས་ཚོས་རང་ཉིད་ལ་ཡ་མཚར་མཚར་གྱིས་ལྟ་སྟངས། གང་ཅིའི་ཐད་ནས་གཞན་ལ་འགྲན་ཟླ་བྱ་མི་ཐུབ་པའི་སེམས་ཁམས་ཀྱིས་ཚེ་དབྱངས་ཧ་ཅང་གིས་ཡིད་ཐང་ཆད་པ་དང་མ་གོམས་པས་དཀའ་ངལ་མང་པོ་དང་། ཁེར་རྐྱང་གི་འཚོ་བས་ཁུ་སིམ་སིམ་སློབ་གྲྭའི་ཉལ་ཁང་ནས་ངུ་ངག་ཤོར་བ་སོགས་ཀྱིས་ཆེས་འུ་ཐུག་ཐབས་ཟད་ཀྱི་སློབ་ཆེན་འཚོ་བ་མགོ་འཛུག་བཞིན་པའི་སྐབས། གཟའ་མཇུག་ལ་སློབ་མ་རྣམས་ནི་སྒོ་ཁྱི་བཏགས་མ་ཤོར་བ་ལྟར་མཚན་ཚོགས་ཀྱི་འཚོ་བར་གོམས་པ་སོགས་ནས་འགྲོ་ས་འདུག་ས་མེད་པའི་ཚེ་དབྱངས་དེ་ལས་ཀྱང་སུན་སྣང་གིས་མི་ཚེ་ནང་ཆེས་ཐོག་མར་ཁེར་རྐྱང་ཟེར་བའི་སེམས་ཁམས་དེ་ངོ་ཤེས་འདུག སྦྱིན་བདག་བཟའ་ཚོ་གཉིས་ལ་འཕྲིན་ཡིག་རེ་སྐུར་ཏེ་པེ་ཅིན་དུ་འདུག་འདོད་མེད་པས་ལྷ་སར་ཕྱིར་ལོག་ཡོང་རྒྱུའི་བསམ་ཚུལ་བྲིས་ཀྱང་སྦྱིན་བདག་བཟའ་ཚོ་གཉིས་ཀྱིས་སློབ་གྲྭ་ཆེན་མོའི་གོ་སྐབས་ནི་སུ་ལ་རག་ཐུབ་པ་ཞིག་མིན་པས་གཅེས་སྤྲས་གནང་སྟེ་ཧུར་བརྩོན་བྱ་དགོས་པའི་སྐུལ་མའི་འོག ཚེ་དབྱངས་ཀྱིས་མུ་མཐུད་ནས་དཀའ་སྡུག་གི་གཟུགས་པོའི་མཉེན་ཆ་སྦྱོང་བརྡར་དང་སྐད་ངག་གི་སྦྱོང་བརྡར་སོགས་ལ་དཀའ་ཐུབ་བྱ་མགོ་བཙུགས་པ་དང་། སྐབས་དེ་དག་ཏུ། དཔོན་རིགས་དེའི་གོ་སྒྲིག་འོག་གཟའ་མཇུག་རེ་རེ་ལ་པེ་ཅིན་གྱི་མགྲོན་ཁང་གང་བཟང་ནས་ཟ་མ་གང་ཡག་ཟོས་ཏེ་བསྡད་པ་དང་། ལན་རེར་དཔོན་པོ་དེ་ལ་འཁྱུག་ཙམ་རེ་ཐུག་པ་དང་ཐུག་ཐེངས་རེ་ལ་ཧ་ཅང་གིས་བྱམས་སྐྱོང་གནང་བ་མ་ཟད། རྒྱུན་དུ་གཟའ་མཇུག་ནམ་ཡིན་ལ་ཁོའི་ལག་འོག་གི་རྒྱ་མོ་དེ་འདྲ་འདུག་རོགས་སུ་མངགས་པ་སོགས་ཚེ་དབྱངས་ལ་རྒྱུས་མེད་པའི་གྲོང་ཁྱེར་འདི་ནས་བྱམས་སྐྱོང་བྱེད་མཁན་དང་རྒྱབ་རྟེན་ལྟ་བུའི་སེམས་ཚོར་རྙེད་པ་དང་། ཕྱོགས་གཅིག་ནས་རང་ཉིད་ལ་ཆུང་དུས་ནས་ཨ་ཕའི་བྱམས་བརྩེ་རག་མ་མྱོང་བས་དཔོན་རིགས་དེ་ནི་ཨ་ཕ་ལྟ་བུའི་ཚབ་ཏུ་བཟུང་འདུག ལོ་ངོ་གཉིས་ཙམ་འགོར་བ་དང་ཚེ་དབྱངས་ཀྱིས་རིམ་བཞིན་ཕ་ཡུལ་མི་ཉག་དང་། ཉི་མ་ལྷ་ས། སྦྱིན་བདག་བཟའ་ཚོ་སོགས་དྲན་གདུང་རིམ་བཞིན་མར་འཇགས་ཤིང་། རྒྱུས་མེད་གྲོང་ཁྱེར་དེ་ནས་སློབ་གྲོགས་ཚོ་དང་འདྲིས་པར་གྱུར་པ། དཔོན་རིགས་དེའི་བྱམས་བརྩེའི་ལྟ་སྐྱོང་འོག་དགེ་རྒན་ཚོའི་དམིགས་བསལ་ལྟ་སྐྱོང་གནང་བ་དང་། དེ་ནས་རིམ་བཞིན་སློབ་གྲྭའི་འཚོ་བར་གོམས་པ་སོགས། ལོ་ན་༡༩་ཡིན་པའི་ཚེ་དབྱངས་ནི་མཛེས་པའི་ངོ་གདོང་གི་མིག་འོད་དུ་སྤོབས་པའི་མདངས་ཤིག་མངོན་ཡོད་པ་སྟེ། དེ་ནི་ཚེ་དབྱངས་ཀྱི་ལྡེམ་མྱུར་ལྡན་པའི་སྐྱེས་གཟུགས་དང་སྙན་ཞིང་འཇེབས་པའི་སྐད་ངག ད་དུང་གྲོང་ཁྱེར་བུ་མོ་སུ་ཡི་གཤིས་སྤྱོད་དུ་མཐོང་དཀོན་པའི་གཤིས་ཡག་གཤིས་འཇམ་གྱི་རང་བཞིན་སོགས་མི་མང་པོས་བསྟོད་བསྔགས་ཐེབས་པ་སོགས་ག་ལེར་ཚེ་དབྱངས་ཀྱི་སྣང་ངོ་རུ་རང་ཉིད་ནི་མི་ཚོགས་འདི་དང་འདྲ་འདྲ་ཚོར་བཞིན་པ་རེད། ཚེ་དབྱངས་རང་ཉིད་ཀྱི་སེམས་སུ་འདི་ལྟ་བུའི་གོ་སྐབས་དང་ཁེ་ཕན་ཡོད་ཚད་རྒྱ་རིགས་དཔོན་རིགས་དེ་ཡིས་སྤྲད་པ་ཡིན་པ་དང་། ད་དུང་ལོ་ངོ་གཉིས་ལྷག་གི་རིང་ལ་ཕ་ལྟར་བྱམས་བརྩེ་ཡིས་བསྐྱངས་པ་དྲན་ནས། རྒྱུན་དུ་ཁོ་ལ་བཀའ་དྲིན་ཞུ་ཐུབ་པའི་གོ་སྐབས་དང་ལས་ཀ་རེ་ཡོད་ན་བསམ་པའི་སྐབས་ཤིག་ལ། དཔོན་རིགས་དེ་ཡིས་ཚེ་དབྱངས་ཁོང་གི་སྡོད་གནས་སུ་སྐད་བཏང་ཞིང་། དེ་ནས་བཟུང་ཚེ་དབྱངས་གཟའ་མཇུག་ལ་དཔོན་རིགས་དེའི་ཁྱིམ་དུ་བསྐྱོད་དེ། ཁྱིམ་དུ་ཡོད་པའི་གླ་མི་ཚོ་ལ་ཁྱིམ་ལས་ཙག་ཙིག་རེ་རོགས་བྱེད་པ་སོགས་བསྡད་དེ་རིམ་བཞིན་དཔོན་རིགས་དེ་དང་ཚེ་དབྱངས་གཉིས་ཀྱི་བར་དུ་ལུས་འབྲེལ་བྱུང་ཡོད་འདུག 

གཏམ་རྒྱུད་བཤད་དེ་འདིར་སླེབས་སྐབས། མགྲོན་ཁང་གི་ལས་མི་ཞིག་གིས། ཁ་པར་ཞིག་ཁྱེར་ནས་ཚེ་དབྱངས་སྐད་བཏང་བྱུང་། ཚེ་དབྱངས་ཀྱིས་དབུགས་རིང་ཞིག་དང་མཉམ་དུ། ངེད་གཉིས་འགྲོ་རན་སོང་ཟེར་ཞོར་ཁ་པར་དེར་ཉན་ཞོར་གྱིས་ཆུ་རྫིང་ལས་ཐོན་པ་དང་། ངས་ཀྱང་ཁོ་མོ་ཆུ་རྫིང་ནས་ཡར་ལངས་རྗེས་གཟུགས་པོས་ཡར་བཏེགས་པ་དང་མར་ཟགས་པའི་ཆུ་ཐིགས་ལ་ལྟ་བཞིན་གཞི་ནས་གཉིད་སད་པ་ལྟར་ཆུ་རྫིང་གཞན་ཁག་ཏུ་མི་མང་པོ་མེད་པ་མཐོང་ཞིང་། ཆུ་རྫིང་ནས་ཡར་ལངས་སྐབས་ཤེལ་དྲ་ལས་མཐོང་བ་ནི་གློག་གཞུ་ཁྲ་ཆིལ་གྱིས་བརྒྱན་པའི་ནེའུ་ཡོག་གི་མཚན་མོའི་གྲོང་ཁྱེར་རེད་ལ། དེ་དུས་ངས་གཞི་ནས་མཚན་མོའི་ཆུ་ཚོད་བརྒྱད་པ་ཙམ་ཟིན་པ་ཚོར་བྱུང་།  ཚེ་དབྱངས་ཀྱིས་མགྲོན་ཁང་གི་ལས་མིས་ཁྱེར་ཡོང་བའི་ལག་རས་དཀར་པོ་ཞིག་གིས་གཟུགས་པོ་བཏུམས་རྗེས། ང་ལ་ལག་རས་ཤིག་སྲིང་བཞིན་ངེད་གཉིས་འདི་ལྟར་མར་མགྲོན་ཁང་དུ་འགྲོ་དང་དེར་གྱོན་པ་བརྗེ་ཆོག་ཟེར། ངས་གྱོན་པ་བརྗེ་རྒྱུ་སོགས་གང་ཡང་ཁྱེར་མེད་པས། ནང་གོས་ཅི་ཞིག་གྱོན་མིན་ལ་བསམ་བློ་གཏོང་བཞིན་ཚེ་དབྱངས་ཀྱི་རྗེས་འདེད་ཞོར་མགྲོན་ཁང་དུ་སླེབས་པ་དང་། ཕྱིར་དྲན་བྱས་ཀྱང་ངེད་གཉིས་ཀྱིས་རྒུན་ཆང་ག་ཚོད་བཏུངས་ཟིན་པ་མ་ཤེས་ཀྱང་ང་ལ་བཟི་སྣང་ཏོག་ཙམ་ཞིག་འདུག མགྲོན་ཁང་གི་སྒོ་ཕྱེས་པ་དང་། ཚེ་དབྱངས་ཀྱིས་དབྱིན་སྐད་ཀྱིས། སྙིང་ཉེ་ལགས། ཁྱེད་ཐོན་ཡོད་དམ། ཞེས་རྗོད་ཞོར་གཟུགས་ཀྱི་མཐོ་ཚད་ཚེ་དབྱངས་དང་མཉམ་པའི་ཕོ་གསར་ཞིག་གི་སྐེད་ལ་འཐམ་ཞོར་འགྲམ་ངོས་སུ་འོ་ཞིག་བྱས་སོང་ལ། ངའི་བསམ་པར་དོན་ངོ་མ་མི་དེ་སུ་ཡིན་ནམ། ད་དུང་སེམས་ནང་དུ་ད་སོ་མ་བཤད་མ་ཐག་པའི་རྒྱ་རིགས་མཐོ་རིམ་དཔོན་རིགས་དེ་དང་ལུས་འབྲེལ་བྱུང་དགོས་དོན་གང་ཡིན་ནམ། དེའི་རྗེས་སུ་དོན་དག་ཅི་བྱུང་བ་དང་ཚེ་དབྱངས་ཨ་རི་ལ་ཇི་ལྟར་སླེབས་པ་སོགས་བསམ་བློའི་ནང་དུ་འདྲ་མི་འདྲ་དྲུག་གསུམ་བཅོ་བརྒྱད་འཁོར་ཡོང་བ་མ་ཟད། ཡང་ཚེ་དབྱངས་དང་ངེད་གཉིས་ཀྱི་གཟུགས་པོར་ལག་རས་དཀར་པོ་རེ་ཡིས་བཏུམས་ཡོད་པ་ལས་གཞན་གྱོན་པ་གྱོན་མེད་པ་སོགས་ཀྱིས། ངོ་ཚ་སྟེ་ངོ་གདོང་ཧྲིལ་བོར་ཚ་བུར་བུར་བྱས་བྱུང། ཅི་བྱ་གཏོལ་མེད་དུ་ཡོད་སྐབས་ཚེ་དབྱངས་ཁ་ཕྱིར་འཁོར་ནས་ང་ལ་ལྟ་ཞོར། འདི་ངའི་བུ་འོད་ཟེར་ཚེ་རིང་རེད་ཅེས་དང་། འདི་ཨ་མདོ་ནས་ཡོང་བའི་ཚེ་རིང་སྐྱིད་རེད་ཅེས་ངོ་སྤྲོད་གནང་བྱུང་། ང་རང་གཞི་ནས་ཅུང་ལྷོད་ལ་འབབ་ཞོར་ཁོ་ལ་བཀྲ་ཤིས་བདེ་ལེགས་ཀྱི་ལག་འཇུ་ཐེངས་གཅིག་བྱས་པ་ཡིན། སྐྲ་ལོ་ནག་ཅིང་དེང་དུས་ཀྱི་ལོ་ན་གཞོན་པའི་སྐྲ་ལོ་ཐུང་ཐུང་དར་སྲོལ་ཆེན་པོ་དེ་ལྟར་མ་ཡིན་པར། ལོ་རབས་བརྒྱད་བཅུ་དང་དགུ་བཅུ་བའི་ནང་དར་སྲོལ་ལྟ་བུའི་སྐྲ་ལོ་ཅུང་རིང་བའི་ཕོ་གསར་འདི་ནི།  ཤ་མདངས་དཀར་ནག་མཉམ་དུ་བསྲེས་པའི་ཆེས་མཛེས་པའི་པགས་པའི་རིགས་ཏེ་ཚེ་དབྱངས་ཀྱི་ཤ་ཁ་དང་འདྲ་ལ། མིག་ཟུང་ནག་ཅིང་ཚེ་དབྱངས་ལྟར་མིག་གི་ཀྲིག་ཀ་ཆེ་བ། ཀློག་འོད་ཀྱི་འོག་ཏུ་འཛུམ་མདངས་ལས་མཐོང་བའི་གྲལ་ལྟར་སྒྲིག་པའི་སོ་ཕྲེང་། དེ་ལས་ཀྱང་སྣ་ཆེ་ཞིང་དབྱིབས་ལེགས་པས་ངོ་གདོང་ལ་ཆེད་དུ་བཟོས་པ་ལྟར་ནམ་རྒྱུན་ལྷོ་ཀོ་རི་ཡའི་གློག་བརྙན་ནང་གི་ཕོ་གསར་མཛེས་སྡུག་ལྡན་པ་དེ་འདྲ་ཞིག་རེད་འདུག ཚེ་དབྱིངས་ཀྱིས་འོད་ཟེར་ཚེ་རིང་གིས་ཁྱེར་ཡོང་བའི་ལག་འདྲུད་ཁུག་མ་ཞིག་གི་ཁ་ཕྱེས་ཏེ་དེའི་ནང་ནས་གྱོན་ཆས་ཕར་སློག་ཚུར་སློག་བྱེད་བཞིན་འདུག་ལ། འོད་ཟེར་ཚེ་རིང་གིས་འཛུམ་མདངས་དང་བཅས་རང་གི་ཨ་མའི་བཟོ་ལྟ་ལ་ཅེར་འདུག ངའི་བསམ་བློའི་ནང་དུ་རྒྱ་རིགས་དཔོན་པོ་དེ་དང་མཉམ་དུ་སྐྱེས་པའི་ཁྲག་རྒྱུན་ལ་འདི་འདྲའི་ཕོ་གསར་གསོན་ཉམས་དོད་པོ་ཇི་ལྟར་སྐྱེས་པ་ཡིན་ནམ་ཞེས་གླེན་འདང་རྒྱག་ཞོར་མིག་ཟུང་གིས་འོད་ཟེར་ཚེ་རིང་གི་མགོ་མཇུག་ལ་ཅེར་ནས་བསྡད་པ་ཡིན། འོད་ཟེར་ཚེ་རིང་གི་གྱོན་པ་རྣམས་ཁ་དོག་དཀར་དམར་ཅན་དང་ཡང་ན་ཁྲ་ཁྲ་སོགས་མ་ཡིན་པར། ཇཱེན་སི་ཁ་དོག་སྔོ་ནག་ཅིག་དང་སྒང་ལ་བལ་གྱིས་བསླས་པའི་སྟོད་ཐུང་ནག་པོ་ཞིག་གྱོན་འདུག སྐེ་རུ་གཡུ་སྔོན་པོ་གཉིས་ཀྱི་བར་དུ་བྱི་རུ་དམར་པོ་ཆུང་ཆུང་ཅན་གྱི་ཤ་ཐོག་ལ་འབྱར་བའི་སྐེ་རྒྱན་རང་གཤིས་ཅན་ཞིག་བཏགས་འདུག་ལ་ད་དུང་ལག་མགོར་ཕྲེང་བ་ནག་པོ་ནང་དུ་གཡུ་སྔོན་པོའི་རྒྱན་ཆ་ཡོད་པ་ཞིག་ཀྱང་བཏགས་འདུག 

ངའི་མིག་ཟུང་འོད་ཟེར་ཚེ་རིང་གི་ལུས་སྟེང་དུ་ཅེར་ཡོད་སྐབས། ཚེ་དབྱངས་དགོད་ཙམ་གྱིས་ང་ལ་ལྟ་ཞོར། ངས་ཚོད་དཔག་བྱས་ཏེ་ཁྱེད་ཀྱི་གཟུགས་པོའི་ཞེང་ཚད་དང་མཐུན་པའི་ནུ་འཐུམ་དང་ནང་གོས། དེ་བཞིན་གྱོན་པ་གཞན་ཁག་ཅིག་འོད་ཟེར་ལ་ཉོ་རུ་བཅུག་པ་ཡིན། ཚུར་ཤོག་ལ་ཚོད་ལྟ་བྱོས་དང་། ང་ཚོ་དགོང་ཟས་བཟའ་རུ་འགྲོ་ཟེར། ངས་ཁུག་མ་དེ་ནས་གྱོན་པ་དེ་རྣམས་བླངས་ཏེ་ཁྲུས་ཁང་དུ་ཁྱེར་ནས་ཚོད་ལྟ་བྱས་པ་ན། ནང་མའི་གོས་ཐུང་རྣམས་ནི་འཛམ་གླིང་ཧྲིལ་བོར་སྐད་གྲགས་ཆེ་བའི་ཝིག་ཀྲོ་རི་ཡའི་གསང་བ་ཞེས་པའི་མིང་རྟགས་དེ་ནས་རེད་ལ། ནང་གོས་ཚོང་རྟགས་འདི་ནི་ནང་གོས་ཁྲོད་ཀྱི་རིན་གོང་ཆེ་ཤོས་ཀྱི་གྲས་དང་སྤུས་ཚད་ལེགས་ཤོས་ཀྱི་གྲས་ཡིན། ངས་རང་ཉིད་དགའ་བ་གཉིས་གདམས་པ་དང་དེའི་རྗེས་ནས་གྱོན་ཆས་རྣམས་ལ་ལྟ་དུས་གྱོན་པ་རྣམས་ནི་བྷིས་བྷིས་ཞེས་པའི་ཚོང་རྟགས་ཅན་དེ་ནས་རེད་འདུག དེའི་ནང་དུ་ཁ་དོག་ནག་པོ་ཅན་གྱི་དཔེ་གསར་ཡིན་པ་གང་ཞིག་ལ་བབ་ཆགས་ཡིན་པའི་དགོང་དྲོའི་གྱོན་ཆས་ཤིག་ཡོད་པ་དེའི་སྟེང་ལ་བལ་གོས་སྲབ་མོ་རིང་པོ་ཞིག་གྱོན་པ་ཡིན། དེ་ནས་མེ་ལོང་ལ་བལྟས་ནས་སྐྲ་དང་གདོང་སོགས་ལ་ཡག་ལས་ཏོག་ཙམ་བྱས་རྗེས་ཚེ་དབྱངས་ལ་གང་འདྲ་ཡོད་མེད་བསྟན་སྐབས། ཏག་ཏག་རེད་འདུག་ཅེས་འོད་ཟེར་ཚེ་རིང་ལ་བསྟོད་བསྔགས་བྱེད་བཞིན་འདུག  ཚེ་དབྱངས་ཀྱིས་བརྗོད་ན་སྤྱིར་བཏང་ཕྱི་རུ་ཟ་མ་བཟའ་རུ་འགྲོ་རྒྱུ་བྱས་ཀྱང་། འུ་གཉིས་གཏམ་རྒྱུད་ཀྱི་ནང་དུ་མགོ་མཁོར་བ་སོགས་ལས་མགྲོན་ཁང་འདིའི་ཀླད་ཁེབས་གཞན་ཕྱོགས་སུ་ཟ་ཁང་དང་ཆང་ཁང་མཉམ་དུ་ཡོད་པས། འདིའི་ནང་གི་ཟ་མ་མི་བཟང་རྒྱུ་མེད་ཟེར་བས། ང་དང་འོད་ཟེར་གཉིས་ཀྱང་མ་གྲོས་གཅིག་མཐུན་གྱིས་ཁོ་མོའི་རྗེས་བསྙེགས་ནས་མགྲོན་ཁང་གི་ཕྱོགས་གཞན་པའི་ཀླད་ཁེབས་ཕྱོགས་སུ་བསྐྱོད་པ་ཡིན། 

ང་ཚོས་རང་རང་གི་ཟ་མ་མངགས་པ་དང་། ངའི་ཀླད་པའི་ནང་དུ་མ་བུ་འདི་གཉིས་ལ་ལྟ་ཞོར་བསམ་བློ་དང་འཆར་སྣང་འདྲ་མིན་སྐྱེ་བཞིན་ཡོད་པས། ཚེ་དབྱངས་ཀྱི་གཏམ་རྒྱུད་མཇུག་མ་རྣམས་མུ་མཐུད་ནས་ཉན་འདོད་སྐྱེས་ལ། ཡང་མིག་མདུན་གྱི་ཕོ་གསར་རྫིག་པོ་འདིར་ལྟ་བའི་གོ་སྐབས་ཀྱང་དམ་འཛིན་བྱ་འདོད། འོད་ཟེར་ཚེ་རིང་གིས། ངེད་གཉིས་ལ་ལྟ་ཞོར། ཨམ་སྐད་འདྲེས་མའི་བོད་སྐད་ཀྱིས། ཁྱེད་གཉིས་ཀྱིས་དེ་རིང་རྒུན་ཆང་ག་ཚོད་ཙམ་འཐུང་ཡིན། ཞེས་འཛུམ་མདངས་དང་མཉམ་དུ་དྲིས་བྱུང་བས། ངས་དོ་སྣང་མ་བྱུང་བའི་ཁོའི་སྐད་གདངས་ལ་ངོ་མཚར་སྐྱེས་ལ་དྲི་ལན་འདེབས་རྒྱུ་བརྗེད་དེ། ལམ་སེང་ཁྱེད་ཀྱིས་བོད་སྐད་གང་ནས་སྦྱངས་པ་ཡིན། ཞེས་འདྲི་བར་ཐལ་སོང་། འོད་ཟེར་ཚེ་རིང་དགོད་ཙམ་བྱེད་སྐབས། ཚེ་དབྱངས་ཀྱིས་ངོ་སྤྲོད་གནང་དོན་ལྟར་ན།  འོད་ཟེར་ཚེ་རིང་ལོ་དྲུག་ནས་བཅུ་བཞིའི་བར་དུ་མཚོ་སྔོན་ཕྱོགས་ཀྱི་འབྲོག་ཁུལ་དུ་་འཚོ་བ་རོལ་བ་དང་དེ་རུ་སློབ་གཉེར་བྱས་འདུག་ལ།  ཚེ་དབྱངས་ཀྱང་ལོ་རེར་ཐེངས་མང་ལྟ་སྐོར་ལ་ཕྱིན་ཡོད་འདུག  ལོ་བཅུ་བཞི་ཡི་སྐབས་འོད་ཟེར་ཚེ་རིང་བསྐྱར་དུ་ཨ་རིར་ཡོང་ནས་མུ་མཐུད་ནས་སློབ་གཉེར་བྱས་ཏེ་མཐོ་རིམ་སློབ་མཐར་ཕྱིན་སྐབས་ཡིག་རྒྱུགས་ཀྱི་གྲུབ་འབྲས་གཟེངས་སུ་ཐོན་པ་བྱུང་ནས། ད་ལྟ་ཀོ་ལིམ་པིས་ཡ་སློབ་གྲྭར་འཕྲོད་བསྟེན་ཚན་པར་སློབ་གཉེར་གནང་བཞིན་ཡོད་འདུག ཚེ་དབྱངས་ཀྱིས་བརྗོད་ན་འོད་ཟེར་ཚེ་རིང་ལོ་ན་༡༥་ལ་སོན་ཙམ་ནས་ཁོ་འཚོ་བ་རོལ་སའི་མཚོ་སྔོན་ཕྱོགས་ཀྱི་འབྲོག་ཁུལ་དེ་གཙོ་བྱས་པའི་ས་ཁུལ་མང་པོ་ཞིག་ཏུ་ལོ་རེར་འདི་ཕྱོགས་ཀྱི་སྨན་པ་དང་སྨན་སོགས་ཁྱེར་ནས་འབྲོག་པ་མང་ཚོགས་ཀྱི་ནད་ལ་ལྟ་བར་སྐྱོད་བཞིན་ཡོད་པ་དང་། དེའི་རྒྱུ་མཚན་གཙོ་བོ་ནི་ཁོ་འབྲོག་ཁུལ་དེར་འཚོ་བ་རོལ་སྐབས་འབྲོག་ཕྲུག་གྲོགས་པོ་ཡག་ཤོས་ཤིག་ཡོད་པ་གློ་བུར་དུ་ནད་ཀྱིས་མནར་ཏེ་སྨན་པར་སྟོན་ཁོམ་མ་བྱུང་བར་འདས་གྲོངས་སུ་གྱུར་པ་ཡིས། ཁོ་རང་ལས་ཀ་འདིའི་ཕྱོགས་སུ་དོ་སྣང་བྱུང་བ་དང། དེ་ནས་བཟུང་ཚེ་དབྱངས་ཀྱིས་ཁོ་ལ་ཕྱོགས་གང་ཐད་ནས་རོགས་འདེགས་བྱེད་བཞིན་ད་ལྟ་ས་ཕྱོགས་མང་པོ་ཞིག་ཏུ་སྨན་ཁང་འཛུགས་ཐུབ་ཡོད་པ་དང་། ད་དུང་ལོ་རེར་འདི་ཕྱོགས་ནས་ཟབ་སྦྱོང་སྤྲོད་མཁན་གྱི་སྨན་པ་མཁོ་འདོན་སོགས་བྱེད་བཞིན་ཡོད་འདུག འོད་ཟེར་ཚེ་རིང་ཡང་ལོ་རེ་རེའི་དབྱར་ཁར་མཚོ་སྔོན་དུ་སོང་ནས་བསྡད་ཡོད་ལ། ཁོ་རི་མོར་འབྲི་རྒྱུར་དགའ་བས། འབྲོག་ཕྱོགས་ཀྱི་འཚོ་བ་དང་མཚོ་སྔོན་ཕྱོགས་ཀྱི་གནམ་ངོ་དང་ས་གཞི་སོགས་ནི་རི་མོ་ལ་ཕབ་ཐབས་མེད་པའི་མཛེས་སྡུག་ཅིག་རེད་ཅེས་ཡང་ཡང་རྗོད་བཞིན་འདུག ཚེ་དབྱངས་ཀྱིས་འདི་ལྟར་ངོ་སྤྲོད་བྱེད་སྐབས་འོད་ཟེར་ཚེ་རིང་གིས་ཨ་མར་འཛུམ་གྱིས་ལྟ་ཞོར་ཉན་ནས་འདུག་ལ། ཁོ་ནི་སྐད་ཆ་བཤད་རྒྱུར་དེ་ཙམ་དགའ་བོ་མེད་མཁན་ཞིག་རེད་འདུག 

ང་ཚོས་གླེང་མོལ་སྣ་ཚོགས་བྱས་པ་དང་ཡང་འོད་ཟེར་ཚེ་རིང་དང་ངེད་གཉིས་ཀྱིས་འབྲོག་ཁུལ་གྱི་འཚོ་བ་དང་གོམས་སྲོལ་སོགས་གླེང་སློང་འདྲ་མིན་བྱེད་ཞོར་ཟ་མ་ཟས་ཚར་ཞིང་། གླེང་མོལ་བརྒྱུད་ཤེས་རྟོགས་བྱུང་བ་ཡིན་ན། འོད་ཟེར་ཚེ་རིང་ནི་ལོ་ན་༢༡་ལས་སོན་མེད་པའི་གྲོང་ཁྱེར་གྱི་ན་གཞོན་ཞིག་དང་མི་འདྲ་བར། མི་ཚོགས་མང་པོ་ཞིག་གི་རེ་བ་དང་བརྩེ་དུང་ཁྱེར་ཡོད་པའི་ཕོ་གསར་རེ་སྙེགས་ཅན་དང་འགན་ལེན་ལྡན་པ་ཞིག་རེད་འདུག ད་དུང་ཁོས་བརྗོད་ན། མཚོ་སྔོན་ཕྱོགས་ཀྱི་བོད་ཀྱི་འབྲོག་པ་ཚོའི་གཤིས་བཟང་ཡ་རབས་ཀྱི་ཀུན་སྤྱོད་ནི་རྒྱུན་དུ་ནས་རང་ཉིད་བོད་མི་ཡིན་པའི་སྤོབས་པ་སྐྱེད་བྱེད་དེ་ཡིན་པ་དང་། བྲེལ་ཟིང་དང་ཟོག་རྫོབ་ཀྱིས་ཁེངས་པའི་གྲོང་ཁྱེར་གྱི་མི་རྣམས་ནི་སའི་གོ་ལ་གད་སྙིགས་བཟོ་མཁན་གྱི་མི་ཚོགས་ཤིག་ཏུ་ངོས་འཛིན་བྱེད་བཞིན་ཡོད་འདུག ཚེ་དབྱངས་ཀྱིས་གད་མོ་དགོད་ཞོར་དུ། ད་ལྟ་གྲོང་ཁྱེར་དུ་ཡོད་པའི་ང་ཚོ་གད་སྙིགས་ཀྱི་ཕུང་བོ་སའི་གོ་ལར་སྤུངས་མཁན་གྱི་ཆ་ཤས་ཤིག་རེད་ཟེར།

རྗེས་སུ་འོད་ཟེར་ཚེ་རིང་གིས་བསྐུར་ཡོང་བའི་ཁོའི་པུར་སྙུག་ལས་བྱུང་བའི་བོད་ཡུལ་གྱི་རི་བོ་དང་གཙང་ཆུ། བོད་མི་དང་སྦྲ་ཁྱིམ། དབེན་དགོན་དང་ལ་ཁའི་ལབ་ཙེ་སོགས་རྗེས་སུ་གློག་འཕྲིན་བརྒྱུད་དེ་མཐོང་དུས་ངོ་མ་མཛེས་ཤིང་ལྟ་ན་སྡུག་པ་ཞིག་རེད་འདུག་ལ། རི་མོའི་ནང་གི་མཛེས་ལྗོངས་དེ་ལྟར་དུ་འོད་ཟེར་ཚེ་རིང་གིས་ཕ་ཡུལ་དང་བོད་མི་ཚོར་བཅོལ་བའི་བརྩེ་དུང་ཡང་མཚོན་ཐུབ ཚེ་དབྱངས་ཀྱིས་བརྗོད་ན་ཁོ་མོས་ཚེ་གང་བོར་དོན་སྙིང་ལྡན་པའི་ལས་ཀ་གང་ཡང་བྱེད་མེད་ཀྱང་ལས་ཀ་འགྲིག་ཡོད་པ་གཅིག་བསྒྲུབས་པ་ནི་འོད་ཟེར་ཚེ་རིང་སྐྱེས་པ་དེ་ཡིན་པ་དང་། བོད་རིགས་ཨ་མ་ཞིག་གི་ངོས་ནས་བོད་ལ་བརྩེ་དུང་ཟབ་པའི་ཁམས་པའི་ཕོ་གསར་ཞིག་སྐྱེད་སྲིང་ཐུབ་ཡོད་པ་འདི་ཡིན་ཟེར། ད་དུང་ཚེ་དབྱངས་ཀྱིས་བརྗོད་ན་འོད་ཟེར་ཚེ་རིང་གི་བསམ་བློ་དང་ལས་འགན་སོགས་རང་གི་ལོ་ཚད་ལས་བརྒལ་ཐུབ་པ་བྱུང་བ་ནི་ཁོ་ལ་ཆུང་དུས་ནས་ཨ་ཕའི་བརྩེ་བ་མ་རག་པ་དང་ངས་ཀྱང་ལོ་ན་ཆུང་དུས་ནས་རྒྱུས་མེད་འབྲོག་ཁུལ་དུ་བསྐྱལ་པ་སོགས་ཀྱིས་ཆུང་དུས་ནས་བསམ་བློ་གཏོང་ཐུབ་མཁན་གྱི་མི་ཞིག་ཏུ་གྱུར་བ་མ་ཟད། འབྲོག་ཁུལ་གྱི་མི་གཤིས་བཟང་པོ་དང་བོད་མིའི་ཀུན་སྤྱོད་བཟང་པོ་ཚང་མ་ཁོང་ལ་ཡོད་ཅེས་ཧ་ཅང་སྤོབས་པའི་སྒོ་ནས་བཤད་བྱུང་ལ། ཚེ་དབྱངས་ཀྱིས་རང་གི་མི་ཚེ་ཕྱེད་ཀ་ལ་ཤུགས་བརྒྱབ་པའི་ཚོང་ལས་ཀྱི་ཡོང་འབབ་ཚང་མས་འོད་ཟེར་ཚེ་རིང་བོད་མི་རིགས་ལ་ཡོད་པའི་བརྩེ་དུང་ཆེ་བ་ལྟར་དུ་མ་འོངས་པའི་བོད་ཁུལ་དུ་འཕྲོད་བསྟེན་ལྟ་སྐྱོང་གི་ལས་གཞི་རྒྱ་ཆེར་སྤེལ་སར་བཀོལ་རྒྱུ་ཡིན་ཚུལ་བརྗོད་སོང་།

ང་ཚོས་སྐད་ཆ་ཡར་མར་གླེང་རྗེས་འོད་ཟེར་ཚེ་རིང་ཕྱིར་ཁྱིམ་དུ་ལོག་ནས། ཚེ་དབྱངས་ཀྱི་གསོ་བཞིན་པའི་ཁྱི་གཉིས་ལ་ཁ་ཟས་སྤྲོད་རྒྱུ་བྱས་སོང་།  ང་དང་ཚེ་དབྱངས་བསྐྱར་དུ་ཆང་ཁང་གི་སྒྲོམ་སྟེགས་སྟེང་སྤོར་ཏེ་མུ་མཐུད་ནས་གླེང་མོལ་བྱས་ཏེ་བསྡད་པ་ཡིན། 

འདིའི་སྔོན་ལ་ངེད་གཉིས་ཆུ་རྫིང་ནས་ཚུར་ཡོང་སྐབས་ཚེ་དབྱངས་ལོ་ན་༡༩ ལ་སོན་སྐབས་རྒྱ་རིགས་དཔོན་པོ་དེ་དང་ལུས་འབྲེལ་བྱུང་བ་དང་འབྲོག་ཁུལ་གྱི་བོད་མོ་གཙང་མ་འདིའི་མི་ཚེ་ཡི་མེ་ཏོག་དེ་རྒྱ་རྒན་ཞིག་ལ་སྤྲད་ཡོད་པ་སོགས་ཀྱི་སྐོར་ནས་བསམ་བློ་བྱུང་འཁོར་ལ། དེ་བཞིན་མི་དང་མིའི་བར་གྱི་བྱམས་བརྩེ་དང་བརྩེ་དུང་ནི་མི་རིགས་ཀྱི་ས་མཚམས་དང་ལོ་ཚད་ལས་བརྒལ་བ་ཞིག་ཡིན་ན། བོད་མི་རིགས་ཀྱི་ལོ་རྒྱུས་ལ་རྒྱུས་ལོན་མེད་པའི་འབྲོག་པའི་བུ་མོ་ཆུང་ཆུང་ཞིག་ལ་མཚོན་ན་འདི་ནི་རྒྱུན་ལྡན་ཞིག་རེད་བསམས་ཏེ། ང་རང་ཉིད་ཀྱི་བསམ་བློའི་ནང་དུ་མཚམས་རེར་ངོ་རྒོལ་དང་མཚམས་རེར་རྒྱབ་སྐྱོར་ལྟ་བུའི་མི་གཉིས་ཀྱིས་རྒྱུ་མཚན་བཤད་དེ་རྡུང་རེས་རྒྱག་བཞིན་པ་དང་འདྲ། 

 

ཚེ་དབྱངས་ཀྱིས་ངེད་གཉིས་ལ་བཏུང་བྱ་མངག་བཞིན་པའི་སྐབས་སུ། ངས་ཚེ་དབྱངས་ལ་ལོ་ན་༡༩ཡིན་སྐབས་ཁྱེད་ཀྱིས་རྒྱ་རྒན་དེ་ལ་ལུས་ཀྱི་མེ་ཏོག་སྤྲོད་དོན་ཅི་ཡིན་ཞེས་དྲིས་སྐབས། ཚེ་དབྱངས་ཧབ་ཆ་ཆེན་པོ་ཞིག་ཤོར་བ་དང་། ཁྱེད་ཀྱིས་དེ་དགོང་ང་དམར་རྗེན་དུ་འཕུད་རྒྱུ་ཡིན་ནམ་ཟེར།

ངེད་གཉིས་ཀྱིས་གློག་འོད་སྣ་ཚོགས་དང་རོལ་དབྱངས་ཟ་ཟིའི་བར་ནས་མུ་མཐུད་ནས་གཏམ་གླེང་བྱས་པ་ཡིན། 

ཚེ་དབྱངས་ཀྱིས་བཤད་ན། སྐབས་དེ་དུས་ཁོ་མོས་རྒྱ་བོད་ཅེས་པའི་མི་རིགས་གཉིས་ཀྱི་རུས་རྒྱུད་ཀྱི་ཁྱད་པར་དང་འགལ་ཟླ་སོགས་མང་པོ་ཞིག་མི་ཤེས་ཀྱང་། རྒྱ་རིགས་དཔོན་པོ་དེ་ནི་རྒྱ་ནག་དབང་འཛིན་མི་སྣའི་ནང་གི་དབང་འཛིན་མི་སྣ་མཐོ་གྲས་ཤིག་ཡིན་པ་མ་ཟད། ཁོས་ཆབ་སྲིད་དང་སྤྱི་ཚོགས་ཀྱི་གནད་དོན་སྒང་དུ་ལས་ངན་སྒྲུབ་པ་དང་ལས་བཟང་སྒྲུབ་པ་གང་ཡིན་བཤད་མི་ཤེས་རུང་། གང་ལྟར་ཚེ་དབྱངས་ལ་ལྟ་སྐྱོང་གིས་ཕ་ཞིག་གི་ཚབ་ཀྱིས་སློབ་སྦྱོང་གི་གོ་སྐབས་སྤྲད་པ་དང་ལྷག་དོན་དུ་མི་མང་པོས་རྨི་ལམ་རྨི་སའི་པེ་ཅིན་སྒྱུ་རྩལ་སློབ་གྲྭ་ཆེན་མོར་སློབ་གཉེར་གྱི་གོ་སྐབས་བསྐྲུན་པ།  དེ་ལས་ཀྱང་རྒྱུས་མེད་གྲོང་ཁྱེར་འདི་ནས་ལོ་ངོ་གཉིས་ལ་ཆགས་སྲེད་ཀྱི་འདོད་བློ་ལྟ་བུ་གཏན་ནས་བསྟན་མ་མྱོང་བ་ལ་སོགས་པས་ཚེ་དབྱངས་རང་གི་འདོད་པ་ལྟར་དུ་དཔོན་པོ་དེ་དང་ལུས་འབྲེལ་བྱུང་བ་ཡིན་འདུག དེ་ནས་བཟུང་ཚེ་དབྱངས་ནི་དཔོན་པོ་ཚང་གི་ཁྱིམ་བདག་མ་ལྟ་བུར་གྱུར་ཅིང་། སློབ་གྲྭར་ཡང་ཚེ་དབྱངས་ནི་སྦྱིན་བདག་ཆེན་མོའི་ཟུར་བསྟེན་ཆུང་མ་དང་ཡང་ན་དཔོན་པོ་མཐོ་བོའི་དགའ་གྲོགས་ཆུང་ཆུང་ཡིན་རབས་སོགས་ཀྱི་གླེང་གཞི་ཆེན་པོ་བྱུང་འདུག  ཡིན་ན་ཡང་ཚེ་དབྱངས་ཀྱིས་བརྗོད་ན། སྒྱུ་རྩལ་སློབ་གླིང་གི་སློབ་མ་དག་ནི་འཁྲབ་སྟོན་པ་དང་སྐད་ངག་ལ་བརྟེན་ནས་འཚོ་བ་རོལ་འདོད་པའི་གསར་བུ་གསར་མོ་ཁྱོད་ལས་ཁོ་རྫིག་རྫིག་དང་ང་ལས་ཁྱེད་མཛེས་མཛེས་བྱེད་མཁན་ཤ་སྟག་ཡིན་པས། ཟུར་བསྟེན་བྱེད་པ་དང་རྒྱུ་ཆེན་ཚོའི་དགའ་གྲོགས་ཆུང་ཆུང་བྱེད་པ་ནི་བུ་དང་བུ་མོ་སུ་ཡང་རྒྱུན་ལྡན་ལྟ་བུར་གྱུར་ཡོད་འདུག དེ་ལྟར་ཟླ་ཤས་འགོར་བཞིན་པའི་གཟའ་མཇུག་གི་ཞོགས་པ་ཞིག་ལ། དཔོན་པོ་དེ་ཡིས་རྒྱུན་དུ་གླེང་བསྡད་པའི་ཨ་མེ་རི་ཀར་ཆབ་སྲིད་རིག་པར་སློབ་གཉེར་བྱེད་བཞིན་པའི་ཁོའི་བུ་སློབ་མཇུག་རྫོགས་ཏེ་ཕྱིར་རང་ཁྱིམ་དུ་ལོག་པའི་ཉིན་ཡིན་ཡང་། དཔོན་པོ་ལས་དོན་གྱི་ཕྱིར་དུ་ཁྱིམ་དུ་མེད་པ་ལྟར་ཚེ་དབྱངས་ལ་བུ་ཡི་བསུ་མ་བྱ་བའི་ལས་འགན་བཅོལ་བ་དང་ཚེ་དབྱངས་ཀྱིས་བུ་དེར་སྣེ་ལེན་བྱེད་སྐབས། ཐོག་དང་པོ་མཐོང་བ་དང་དཔོན་པོའི་བུ་ཡིས་ཁོ་མོར་ཅེར་ནས་ཡུན་རིང་འགོར་ཞིང་དེ་མ་ཐག་པུར་སྨྱུག་དང་རི་མོ་འབྲི་སའི་སྒྲོམ་བྱང་ཁྱེར་ཡོང་ནས། ཚེ་དབྱངས་ལ་སྐད་ཆ་གང་ཡིན་བཤད་ཁོམ་མ་བྱུང་བར། ཐད་ཀར་དཔུང་བར་འཐམས་ནས་དེ་ལྟར་འདུག་རོགས། མ་འགུལ་རོགས། མིག་དང་འཛུམ་མདངས་དེ་ལྟར་ཉར་རོགས་ཅེས་རྗོད་ཞོར་དུ་རི་མོ་འབྲི་མགོ་བརྩམས་པ་དང་། རྗེས་སུ་དཔོན་པོའི་བུ་དེ་ཡིས་བརྗོད་ན་ཚེ་དབྱངས་ཉིན་དེར་རི་མོར་བཀོད་པ་ནི་ཚེ་འདིའི་ཆེས་སྤྲོ་སེམས་ཆེ་བའི་རི་མོའི་བརྩམས་ཆོས་ཡིན་རབས་བཤད་འདུག

དཔོན་པོའི་བུ་དེ་ནི་དཔོན་པོ་དེའི་བཀའ་བཀོད་ལྟར་ཨ་མེ་རི་ཀའི་ཧ་ཝར་སྒྲི་སློབ་ཆེན་གྱི་ཆབ་སྲིད་རིག་པའི་སློབ་གཉེར་བྱེད་པར་བསྐྱོད་ཀྱང་། ཆུང་དུས་ནས་ཨ་མ་མེད་པ་དང་དཔོན་པོ་ཡང་ལས་ཀའི་དོན་དུ་བུ་དེར་ཕ་ཞིག་གི་བྱམས་སྐྱོང་ངོ་མ་དེ་སྤྲོད་ཐུབ་མེད་པ་སོགས། གཞོན་དུས་ཀྱི་སེམས་ནང་གི་ཁེར་རྐྱང་གི་དཀའ་ངལ་ཡོད་ཚད་རི་མོ་འབྲི་བར་གོམས་པ་ལྟར། ཧ་ཝར་སྒྲི་སློབ་ཆེན་གྱི་སློབ་གཉེར་གོ་སྐབས་བཞག་སྟེ། ནེའུ་ཡོག་གི་རི་མོའི་སྒྱུ་རྩལ་སློབ་གླིང་ཆེས་སྤྱིར་བཏང་ཞིག་ཏུ་སློབ་གཉེར་བྱས་པ་དང་། ཞོར་དུ་དཔོན་པོོ་ཨ་ཕས་བསྐུར་པའི་དངུལ་སོགས་ཀྱིས་མ་རྩ་བྱས་ཏེ་གཞན་དང་མཉམ་འབྲེལ་གྱིས་ཚོང་ལས་གཉེར་བ་དང་། ཉེའུ་ཡོག་ཏུ་ཚོང་ལས་རྟེན་གཞི་བརྟན་པོ་བཙུགས་ཡོད་པ་ཞིག་ཡིན་འདུག (དགོངས་དག དཔོན་པོ་དེའི་བུ་ཡི་མིང་ལ་ཚེ་དབྱངས་ཀྱིས་ཀྲི་ཕང་ཞེས་འབོད་བཞིན་འདུག དོན་དངོས་རུས་མིང་སོགས་འདིར་བཀོད་སྟབས་མི་བདེ། ) ཚེ་དབྱངས་ཀྱིས་བརྗོད་ན་ཀྲི་ཕང་གིས་ཁོ་མོ་ཉིན་དང་པོར་མཐོང་བ་ནས་སེམས་པ་ཤོར་བ་དང་། ཚེ་དབྱངས་དཔོན་པོ་ལ་ཐུག་རྒྱུའི་ཁ་གྲངས་ཇེ་ཉུང་ཕྱིན་པ་དང་ཀྲི་ཕང་དང་འཕྲད་རྒྱུའི་ཁ་གྲངས་ཇེ་མང་ལ་སོང་ཡོད་པ་མ་ཟད། ཀྲི་ཕང་གིས་ཚེ་དབྱངས་བོད་པ་ཡིན་པ་དང་འབྲོག་ཁུལ་ནས་འཚོ་བ་རོལ་བ་སོགས་ཤེས་རྗེས་ལྷག་དོན་དུ་ཚེ་དབྱངས་ལ་དགའ་བོ་བྱས་པ་དང་། ཀྲི་ཕང་བརྒྱུད་དེ་ཚེ་དབྱངས་ཀྱིས་མི་ཚེ་འདིར་མོ་ལོ་༡༩རིང་ལ་གོ་མ་མྱོང་བའི་གནས་ལུགས་མང་པོ་རྟོགས་པ་མ་ཟད། ཀྲི་ཕང་ནི་དཔོན་རིགས་དེ་དང་མི་འདྲ་བར། སྲིད་དང་དབང་གི་ཕྱོགས་ལ་དོ་སྣང་མེད་ཅིང་། རི་མོ་དང་སྒྱུ་རྩལ། ཚོང་ལས་ལ་དོ་སྣང་ཆེ་བ་མ་ཟད་། ཀྲི་ཕང་ནི་ཚེ་དབྱངས་ལ་རིག་གནས་གསར་བརྗེ་ཞེས་པ་དེ་ཇི་ལྟར་བྱུང་བ་དང་། ཀྲི་ཕང་གི་བཅིངས་གྲོལ་དམག་མི་ཡིན་པའི་ཨ་མས་རང་ཉིད་བློས་གཏོང་བྱེས་ཏེ་གསར་བརྗེ་ཞེས་པའི་ཁ་གཡང་གདམས་ནས་དམག་ས་རུ་རྐྱེན་འདས་སུ་སོང་བ་སོགས་ཀྱི་བརྒྱུད་རིམ་བཤད་ཅིང་། ཚེ་དབྱངས་ཀྱིས་རང་གི་ཨ་མས་ཆུང་དུས་བཤད་པའི་ཨ་ཕ་ནི་རིག་གནས་གསར་བརྗེའི་སྐབས་སུ་འཐབ་རྩོད་བྱེད་དུ་ཁྲིད་རྗེས་ནས་ཕྱིར་ཡོང་མེད་སོང་བའི་ལོ་རྒྱུས་སོགས་གཞི་ནས་མི་མང་གིས་མྱངས་ཟིན་པའི་ལོ་ཟླ་ནག་པོ་ཞིག་གི་ཟུར་ཙམ་ཀྲི་ཕང་གིས་ངག་ལས་ཐོས་ཤིང་། ཀྲི་ཕང་གི་གཤིས་འཇམ་དང་གུ་ཡངས། བག་ལྷོད་དང་བསམ་བློ་སོགས་ལ་ཚེ་དབྱངས་ཀྱང་ལྐོག་ནས་ཀྲི་ཕང་ལ་སེམས་པ་ཤོར་ཡོད་འདུག 

རིམ་བཞིན་ཚེ་དབྱངས་ཀྱིས་དཔོན་པོ་དང་བུ་གཉིས་ཀྱི་བར་དུ་ཐུན་མོང་གི་སྐད་ཆ་མེད་པ་དང་དཔོན་པོས་བུ་ཀྲི་ཕང་གི་བསམ་བློ་ནོར་འཁྲུལ་ཡིན་པ་དང་བུ་ཡིས་ཨ་ཕའི་ཀླད་པ་རྙིང་བ་ཡིན་པ་སོགས་བཤད་དེ་ཕ་བུ་ཕན་ཚུན་བར་དུ་གོ་བརྡ་འཕྲོད་ཐབས་མེད་པས། ཚེ་དབྱངས་ནི་ཁོ་ཕ་བུ་གཉིས་བར་གྱི་ཕོ་ཉ་ལྟ་བུར་གྱུར་པ་དང་། དེའི་རྗེས་རིམ་བཞིན་དཔོན་པོ་ཕྱི་ལ་འགྲོ་རྒྱུའི་ཁ་གྲངས་ཇེ་མང་དང་ལན་རེར་ཟླ་ཤས་ལ་ཡང་ཚེ་དབྱངས་ཀྱིས་མཐོང་མི་ཐུབ་པ་བརྒྱུད་དེ་རིམ་བཞིན་ཀྲི་ཕང་དང་ཚེ་དབྱངས་ཀྱི་བར་དུ་བརྩེ་དུང་ཆགས་ཤིང་། ཚེ་དབྱངས་ཀྱི་སློབ་གྲྭའི་དབྱར་གནང་དང་མཉམ་དུ་ཀྲི་ཕང་གིས་ཚེ་དབྱངས་འཚར་ལོངས་བྱུང་སའི་ཕ་ཡུལ་མི་ཉག་འབྲོག་ཁུལ་དུ་ལྟ་སྐོར་ལ་བསྐྱོད་པར་རེ་བ་བཏོན་ཏེ། ཚེ་དབྱངས་ཀྱིས་ལོ་ངོ་ལྔ་ལྷག་ལ་གྱེས་ཟིན་པའི་ཕ་ཡུལ་དྲན་པ་དང་མཉམ་དུ་ཁོ་གཉིས་མི་ཉག་ཏུ་སོང་ཡོད་པ་རེད། 

མི་ཉག་ཏུ་ཀྲི་ཕང་གིས་གནམ་ས་ཡོད་ཚད་དང་བོད་མི། རི་དང་གཙང་བོ། བྱ་བྱེའུ་འབའ་འབུ། མེ་ཏོག་དང་རྩི་ཤིང་སོགས་ཡོད་ཚད་རི་མོར་ཕབ་ཅིང་། ད་དུང་ཚེ་དབྱངས་ལ་ཐོག་དང་པོར་མི་ཚེ་འདིར་ཆེས་ཐོག་མའི་ཏཱ་ལའི་བླ་མ་ཞེས་པའི་བོད་ཀྱི་བླ་མ་ཞིག་གི་གཏམ་རྒྱུད་ཀྱང་བཤད་འདུག ཚེ་དབྱངས་ཀྱིས་བརྗོད་ན་ཆུང་དུས་ནས་༧རྒྱལ་བ་པན་ཆེན་གཉིས་ཀྱི་མཚན་ནས་བཟུང་སྟེ་སྨོན་ལམ་གསོལ་འདེབས་ཞུ་བཞིན་པ་ཡང་ཡང་གོ་མྱོང་ལ་ཨ་མ་གཙོས་པའི་སྡེ་མི་ཚོས་ཁ་ཁུ་སིམ་པོའི་ངང་ནས་མཚན་འདི་གཉིས་ནས་འབོད་བཞིན་པ་ཡང་ཡང་གོ་མྱོང་ཡང་། ཏཱ་ལའི་བླ་མ་ཞེས་པའི་བོད་ཀྱི་བླ་མ་ཞིག་གི་མཚན་དེ་ཐོག་མར་ཐོས་པ་ཡིན་པ་རེད། ཀྲི་ཕང་གིས་ཚེ་དབྱངས་ལ་ངོ་སྤྲོད་བྱས་པ་ལྟར་ན། རྒྱའི་དམག་གིས་བོད་ས་བཙན་བཟུང་བྱས་པ་དང་། ལྷ་སའི་ཕོ་བྲང་པོ་ཏཱ་ལ་བཞུགས་གནས་གནང་མྱོང་བའི་༧ཏཱ་ལའི་བླ་མ་བོད་མི་མང་པོ་དང་མཉམ་དུ་གཞན་ཡུལ་དུ་བཙན་བྱོལ་དུ་ཕེབས་དགོས་བྱུང་བ། བོད་དུ་སྐབས་དེའི་དཔུང་འཇུག་ཁྲོད་ནས་བོད་མི་མང་པོའི་ཚེ་སྲོག་ཤོར་ཡོད་པ་སོགས་ཀྱི་ལོ་རྒྱུས་བཤད་པ་དང་། དེ་ལས་ཀྱང་ཚེ་དབྱངས་ལ་ཁྱེད་ཉིད་ནི་ཏཱ་ལའི་བླ་མར་དད་པའི་མི་རིགས་ཤིག་གི་བུ་རབས་ཚ་བརྒྱུད་ཡིན་པས། ཁྱེད་ཀྱིས་རང་ཉིད་བོད་མི་ཞིག་ཡིན་པ་བརྗེད་མི་ཉན་པ་དང་དེ་ལས་ཀྱང་ཁྱེད་ཀྱིས་ཕ་ཡུལ་གྱི་དྭངས་གཙང་གི་མཁའ་དབུགས་དང་རི་ཆུ་ནགས་གསུམ། སྙིང་རྗེ་ཆེ་ཞིང་ཞི་དུལ་ལྡན་པའི་མི་རིགས་འདི་ཚོ་བརྗེད་མི་ཉན་ལ་སོགས་པའི་ཨ་ཕ་ཞིག་གིས་བུ་མོ་ཞིག་ལ་སློབ་གསོ་རྒྱག་པ་ལྟར་ཚེ་དབྱངས་ལ་གཅིག་གཅིག་གཉིས་གཉིས་བྱས་ཏེ་བཤད་མྱོང་འདུག་ལ། ཚེ་དབྱངས་ཀྱིས་དང་ཐོག་གོ་བ་ཡག་པོ་ལེན་མི་ཐུབ་པ་དང་སྐད་ཆའི་ནང་དོན་མང་པོ་ཞིག་གོ་མི་ཐུབ་ཀྱང་ད་ལྟ་ཕྱིར་འདངས་བརྒྱབ་ན་ཀྲི་ཕང་རང་གི་བུ་འོད་ཟེར་ཚེ་རིང་གི་ཨ་ཕར་གྱུར་པ་ཙམ་དུ་མ་ཟད། རང་ཉིད་དང་འོད་ཟེར་ཚེ་རིང་གཉིས་ལ་མཚོན་ན་བོད་མི་ངོ་མ་ཞིག་ཏུ་འགྱུར་དུ་མཇུག་མཁན་གྱི་མི་དེ་ཡང་ཡིན་པ་རེད། 

དེའི་རྗེས་ཀྱི་ལོ་ངོ་གཅིག་གི་ནང་དུ་དཔོན་པོས་ཀྱང་ཚེ་དབྱངས་དང་ཁྲི་ཕང་གི་འབྲེལ་ལམ་ཤེས་ཤིང་དངོས་སུ་མ་འདོད་པའི་རྣམ་འགྱུར་མ་བསྟན་པ་མ་ཟད། ཀྲི་ཕང་ལ་ཆུང་དུས་ཨ་མ་མེད་པ་དང་རང་གིས་ཀྱང་བྱམས་སྐྱོང་བྱེད་མ་ཐུབ་པ་སོགས་ཀྱིས་ཐེངས་འདིར་བུ་ལ་བརྩེ་དུང་གི་འཛུམ་མདངས་རྙེད་པར་བཀག་འགོག་གང་ཡང་བྱེད་མེད་པར་སྔར་བཞིན་ཚེ་དབྱངས་ལ་ཟླ་རེའི་འཚོ་བའི་འགྲོ་གྲོན་དང་སྔར་བཞིན་རིན་གོང་ཆེ་བའི་ལེགས་སྐྱེས་སྣ་ཚོགས་སྤྲོད་བཞིན་ཡོད་འདུག ཚེ་དབྱངས་སྒྱུ་རྩལ་སློབ་གླིང་གི་ལོ་བཞི་བའི་སྐབས་ལ།་མངལ་ཆགས་པ་དང་། གྲོད་ཁོག་ཉིན་རེ་ནས་ཉིན་རེར་ཇེ་ཆེར་འགྲོ་བ་སོགས་ཀྱིས་སློབ་གྲྭར་མུ་མཐུད་ནས་སྡོད་ཐབས་མ་བྱུང་བར་གནས་སྐབས་སློབ་གྲྭ་ནས་ཕྱིར་འཐེན་བྱས་པ་དང་། དེའི་རྗེས་ཀྲི་ཕང་དང་དཔོན་པོ་གཉིས་ཀྱིས་ཚེ་དབྱངས་ཨ་རིར་བཏང་ཡོད་པ་རེད་ལ། ཨ་རིར་ཡོད་པའི་ཀྲིི་ཕང་གི་མ་རྩ་འཛུགས་སའི་ཟ་ཁང་ཞིག་གི་མ་རྩ་གཞན་རྣམས་ཀྱང་དཔོན་པོ་དེ་ཡིས་འགྲོ་སོང་བཏང་ནས་ཟ་ཁང་ཧྲིལ་བོ་ཚེ་དབྱངས་ཀྱི་མིང་ཐོག་ལ་བཀོད་པ་དང་། ཚེ་དབྱངས་ལ་འཚོ་བའི་འགྲོ་གྲོན་གྱི་མ་དངུལ་སོགས་འདང་ངེས་ཀྱིས་ཀྲི་ཕང་གིས་ཚེ་དབྱངས་ཨ་རིར་སྐྱེལ་མ་བྱས་ཡོད་འདུག 

ཚེ་དབྱངས་ཀྱིས་བརྗོད་ན། སྐབས་དེར་ཁོ་མོ་ལོ་ན་༢༡ལས་སོན་མེད་པ་དང་ཀྲི་ཕང་ལོ་༢༥་ཙམ་ཡིན་པས་གཉེན་སྒྲིག་ཀྱང་མ་འགྲིག་པ་མེད་ཀྱང་། ཐོག་མར་ཚེ་དབྱངས་མངལ་ཆགས་དུས། ཀྲི་ཕང་གིས་ཚེ་དབྱངས་ལ་བོད་མི་མང་པོས་དགྲ་ལྟར་ལྟ་སའི་རྒྱ་རིགས་ཤིག་གི་ཁྲག་རྒྱུན་གྱི་བུ་རབས་ཚ་བརྒྱུད་སྤེལ་ཚེ། གཅིག་བྱས་ན་ཚེ་དབྱངས་འཚར་ལོངས་བྱུང་བ་དང་གནས་ཚུལ་མང་པོ་ཤེས་རྗེས་འགྱོད་པ་སྐྱེ་སྲིད་ལ། ཕ་མེས་ཡང་མེས་ཚོས་ལེ་བདའ་བྱེད་སྲིད་པ། དེ་བཞིན་ཀྲི་ཕང་ལ་གཉེན་སྒྲིག་བྱས་ཀྱང་དེ་ལྟར་དུ་གཅིག་བྱས་ན་ཚེ་དབྱངས་ཚེ་གང་བོར་འགྱོད་སྐྱེས་སྲིད་པ་ལ་སོགས་ཀྱི་ཐད་ནས་སྐད་ཆ་བྱུང་ཞིང་། མཐར་ཚེ་དབྱངས་དང་ཀྲི་ཕང་གཉིས་ཀྱིས་ཨ་རིར་སོང་ནས་བྱིས་པ་སྐྱེ་རྒྱུ་དང་། བྱིས་པ་སྐྱེས་རྗེས་གཉེན་སྟོན་རྗེས་ཕྱོགས་བྱ་ངེས་པ་ལ་སོགས་པའི་གྲོས་བྱས་ཏེ་མཐར་ཚེ་དབྱངས་ཨ་རི་ལ་འབྱོར་ཡོད་འདུག 

གཏམ་རྒྱུད་བཤད་ཞོར་རྒུན་ཆང་འཐུང་ཞོར་དུ། ཕལ་ཆེར་མཚན་གུང་ཆུ་ཚོད་བཅུ་གཅིག་ཙམ་ཟིན་སོང་བས། ཚེ་དབྱངས་དང་ངེད་གཉིས་གཞི་ནས་ཚུར་མགྲོན་ཁང་གི་ཁང་མིག་ཏུ་འབྱོར་བ་དང་། ཚེ་དབྱངས་ཀྱིས་བརྗོད་ན། ཀྲི་ཕང་དང་ཁ་གྱེས་པའི་ལོ་ཟླའི་བར་དུ་འཛོམས་པ་ལས་གྱེས་པ་མང་ཞིང་། ཁེར་རྐྱང་གིས་བུ་འོད་ཟེར་ཚེ་རིང་གཉོར་སྐྱོང་བྱས་པ་དང་། ཚེ་དབྱངས་ཀྱིས་ཡར་མར་གྱི་མི་རྣམས་དང་འབྲེལ་བ་བྱུང་བ། ཨ་རིའི་སྤྱི་ཚོགས་དང་འགྲོགས་པས། མཐར་བརྩེ་དུང་ལྡན་པའི་རྒྱ་རིགས་རི་མོ་བ་འདི་དང་གཉེན་སྒྲིག་མི་བྱེད་པའི་ཐག་གཅོད་བྱས་ཡོད་འདུག རང་ཉིད་གཅིག་པུ་ཡིས་འོད་ཟེར་ཚེ་རིང་སྐྱེད་སྲིང་བྱེད་སྐབས་ཀྱི་འཇིག་རྟེན་གྱི་བརྩེ་དུང་ལྡན་པའི་དགའ་གྲོགས་ཤིག་བློས་གཏོང་བྱས་པ།  ཡང་ན་ལོ་རྒྱུས་དང་དོན་དངོས་ཀྱིས་བུད་མེད་ཅིག་ལ་དགོས་པའི་གཉེན་སྒྲིག་གི་རྨི་ལམ་མེད་པར་བཏང་བ། འགྲན་རྩོད་དང་གདུག་རྩུབ་ཆེ་བའི་ཚོང་རའི་དམག་འཁྲུག་ནས་བོད་མཐོ་སྒང་གི་འབྲོག་མོ་ཞིག་གིས་ཕམ་ཁ་མ་ཉོས་པ།   བོད་རིགས་ཨ་མ་ཞིག་གི་ངོས་ནས་བྱིས་པ་གསོ་སྐྱོང་གི་སེམས་ཚེགས་དང་བློས་གཏོང་སོགས་མང་པོ་ཞིག་བཤད་ཀྱང་དགོང་མོ་དེར་ང་རང་དངོས་སུ་བཟི་ཡོད་པར་སྣང་བས་མང་པོ་ཞིག་སེམས་ངོར་བཟུང་མི་འདུག 

ཕྱི་ཉིན་གཉིས་སད་དུས། ཚེ་དབྱངས་ཀྱིས་སྔ་ས་ནས་ཞོགས་ཇ་མངགས་པ་དང་ཚགས་པར་ཞིག་ཀློག་བཞིན་ང་རང་གཉིད་ལས་སད་པར་བསྒུགས་འདུག ང་རང་ཡར་ལངས་པ་དང་ཚེ་དབྱངས་ཀྱིས། ཁ་སང་ངས་མི་ལོ་མང་པོར་ཕྱིར་དྲན་བྱ་མ་ཕོད་པའི་གནས་ཚུལ་མང་པོ་ཞིག་ཁྱེད་ལ་བཤད་ཟིན། དེ་རིང་དེའི་ཐད་ཀྱི་སྐད་ཆ་རྣམས་ཕར་བཞག་སྟེ་ངས་ཁྱེད་རང་སྐྱིད་པོ་གཏོང་སར་འཁྲིད་ཆོག དེ་བས་མགྱོགས་མྱུར་ཞོགས་ཟས་ཟོ་དང་། འོད་ཟེར་གྱིས་འུ་གཉིས་ཀར་མགྲོན་ཁང་གི་ཐང་ཆེན་དུ་བསྒུགས་འདུགཟེར། 

(འདི་ནི་མཁུར་ཚོས་དམར་པོ་ཞེས་པའི་དེབ་དེའི་ནང་གི་བྱུ་རུའི་སྐྲ་འཛར་ཡིན་ལ། ཚེ་དབྱངས་ཀྱི་གཟུགས་པོ་ཧྲིལ་བོར་དེང་རབས་གྱོན་ཆས་ཀྱིས་གཡོགས་ཀྱང་། བུད་མེད་ཅིག་ལ་མཚོན་ན་སྐྲ་ལོ་ནི་བུད་མེད་དེའི་མཛེས་སྡུག་གི་ཆ་ཤས་གལ་ཆེན་ཞིག་ཏུ་གྲུབ་པ་ལྟར་དུ། ཚེ་དབྱངས་ཀྱི་མཛེས་སྡུག་གི་ཕྱེད་ཀ་ཡར་འདེག་བྱེད་ཀྱི་བྱུ་རུའི་སྐྲ་འཛར་དེ་ཇི་བཞིན། ཚེ་དབྱངས་ནི་ཨ་རིའི་གྲོང་ཁྱེར་ནེའུ་ཡོག་གི་འདུ་འཛི་དང་ཟང་ཟིང་རྒོད་ཅིང་མི་ཚོགས་མང་ཤོས་ཀྱི་གྲོང་ཁྱེར་འདིར་འཚོ་བ་རོལ་ཞིང་། ཁོ་མོའི་སེམས་ཀྱི་གཏད་ས་དང་བླ་སྲོག་གི་གཞི་བདག་ནི་འོད་ཟེར་ཚེ་རིང་ཡིན་པ་དང་། འོད་ཟེར་ཚེ་རིང་ནི་བོད་ཀྱི་རི་ཆུ་ནགས་གསུམ་དང་བོད་རིགས་མི་མང་ལ་བརྩེ་དུང་ཆེ་བའི་གངས་ཀྱི་ཕོ་རྒོད་ཅིག་ཡིན་པས། ཚེ་དབྱངས་ཀྱིས་ཚེ་འདིར་འོད་ཟེར་ཚེ་དབྱངས་སྐྱེས་ཏེ་དྲིན་ཆེན་ཨ་མ་ཞིག་གི་ཤ་ལས་མཆེད་པའི་བུ་ཆུང་རྒྱང་རིང་དུ་བསྐྱོད་པའི་དྲན་གདུང་བཟོད་པར་བྱས་ཏེ་བོད་ཀྱི་འབྲོག་ཁུལ་དུ་བཏང་བ་སོགས་ཀྱི་བརྒྱུད་རིམ་ལས། ངས་ཚེ་དབྱངས་ཐོག་དང་པོ་མཐོང་དུས་ཀྱི་རང་གཤིས་ནས་གྲུབ་པའི་མཛེས་མ་ཞིག་ལས་ལྷག་པའི་བཀུར་བསྟི་འཐོབ་འོས་པའི་བོད་ཀྱི་ཨ་མ་ཞིག་ཏུ་མཐོང་སོང་། ཚེ་དབྱངས་ཀྱིས་བརྗོད་པ་ལྟར་བདེན་པ་ནུས་མེད་དུ་བརྩི་བའི་དུས་རབས་འདི་དང་སྤྱི་ཚོགས་འདི་རུ། ངས་ཚེ་དབྱངས་ཀྱི་བདེན་པའི་གཏམ་རྒྱུད་འདི་ནི་གཡོ་བག་དང་ཟོལ་རྫུན་གྱིས་མ་གྲུབ་པའི་ཆེས་འོད་དུ་འཚེར་བའི་མུ་ཏིག་རྡོག་ཅིག་ཏུ་མཐོང་ལ། བྱི་རུའི་སྐྲ་འཛར་ལྟ་བུའི་ཚེ་དབྱངས་ནི་བོད་རིགས་བུད་མེད་ཚོའི་རྒྱན་ཆ་ཞིག་ཏུ་བསམས་ཏེ། ཕྱིར་རྒྱལ་ས་ཝ་ཤིན་ཀྲོན་དུ་ཡོང་བ་ཡིན།)

རྫོགས་སོ། 

 

 

བྱུ་རུའི་སྐྲ་འཛར།

Published ཟླ་བཅུ་པ། 12, 2013 by Tsering kyi

བྱུ་རུའི་སྐྲ་འཛར།

image

དེ་ནི་སྤྱི་ལོ་༢༠༡༢ལོའི་ཟླ་བཅུ་བའི་ཉིན་ཞིག་ཏེ་སྟོན་མཇུག་གི་དུས་ཚིགས་ཀྱིས་གནས་གང་དུ་ཡང་དགའ་སྐྱོ་ཟུང་གི་ཚོར་བ་སྦྱིན་པའི་ཡུལ་ལྗོངས་ཀྱི་རྣམ་པ་མངོན་ཡོང་། རྒྱལ་ས་ཝ་ཤིན་ཀྲོན་ནས་ནེའུ་ཡོག་གྲོང་ཁྱེར་ལ་བསྐྱོད་སའི་གཞུང་ལམ་གྱི་གཡས་གཡོན་དུ་ངས་ཀྱང་གྲལ་ལྟར་རྒྱུགས་བཞིན་པའི་རླངས་འཁོར་འཚང་ཀའི་བར་ན་རྣམ་རིག་གཏད་ནས་ལམ་ཀར་ལྟས་ཤིང་ཡང་བར་བར་ནས་རླངས་འཁོར་རྒྱུགས་ཚད་ཇེ་དལ་དུ་འགྲོ་སྐབས། སྒེའུ་ཁུང་ལས་སྡོང་ལོ་ས་ལ་ཟགས་ཏེ་ལམ་ཆུང་གཡོག་པའི་རྣམ་པ་དང་སྡོང་ལོའི་ཁ་དོག་དམར་སེར་ཅན་ལ་འགྱུར་བའི་མཛེས་སྡུག་གི་རྣམ་པར་ལྟ་ཞོར་བྱས། སེམས་སུ་དུས་བཅད་བྱེད་པ་ལྟར་(མཁུར་ཚོས་དམར་པོ)ཞེས་པའི་དེབ་ཀྱི་ནང་དུ་གདམས་ཟིན་པའི་བོད་ཀྱི་བུད་མེད་ཅིག་ལ་བཅར་འདྲི་བྱེད་པའི་ས་གནས་དེར་ཏག་ཏག་སླེབས་ཐུབ་མིན་ལ་སེམས་འཚབ་ཀྱི་ངང་ཡོད།

ང་ནི་དུས་རྒྱུན་དུ་དོན་དག་ཅི་ཞིག་ཡིན་ཡང་འཆར་གཞི་འདེང་རྒྱུར་གཏན་ནས་མི་དགའ་ཞིང་ལྷག་དོན་དུ་མི་ཞིག་ལ་བཅར་འདྲི་བྱ་དགོས་ན་དེར་དྲི་བ་ཅི་ཞིག་འདྲི་འདོད་པ་གྲ་སྒྲིག་བྱེད་ན་གཏན་ནས་མི་འདོད་མཁན་ཞིག་ཡིན། ང་ཡང་ཐོག་མར་གསར་འགོད་ལས་རིགས་ལ་འཛུལ་དུས་སྐབས་སུ་གནས་ཚུལ་རྒྱུས་ལོན་ཆེད་མི་ལ་བཅར་འདྲི་བྱ་དགོས་པའམ་ཡང་ན་མི་ཞིག་གི་ལོ་རྒྱུས་ཐད་བཅར་འདྲི་བྱ་དགོས་པ། མདོར་ན་བཅར་འདྲི་རིགས་གང་ཞིག་ཡིན་ཡང་ཐོག་མ་ནས་རྒྱུས་ལོན་དང་གྲ་སྒྲིག་ཨང་གསར་བྱེད་བཞིན་ཡོད། ཡིན་ན་ཡང་ལས་ཀ་བྱེད་པའི་རྒྱུད་རིམ་ཁྲོད་དུ།མི་ཞིག་ལ་རང་གི་མི་ཚེ་ལོ་རྒྱུས་ཐད་ནས་བཅར་འདྲི་བྱ་དགོས་ན་དེར་ཐོག་མར་དྲི་བ་སོགས་གང་ཡང་གྲ་སྒྲིག་མ་བྱེད་པར་ཆེས་སྤྱིར་བཏང་གི་གླེང་མོལ་ནས་མགོ་བཙུགས་ན་ཧ་ཅང་གིས་རན་པ་དང་ལྷག་དོན་དུ་སྤྱིར་བཏང་གི་ཁ་བརྡ་དང་མཉམ་དུ་སྐད་ཆའི་ནང་ནས་དྲི་བ་བཙལ་བཞིན་གླེང་མོལ་བྱེད་ན་མིའི་རང་བྱུང་ལྷན་སྐྱེས་ཀྱི་སེམས་ཁམས་བསྔོགས་ཐུབ་པའི་ཚོར་བ་ཞིག་བྱུང་ཡོད་པས། ཉིན་དེར་ཡང་ངས་ཉིན་དེར་ངའི་བཅར་འདྲི་བྱེད་སའི་བུད་མེད་དེར་དྲི་བ་སོགས་གང་ཡང་གྲ་སྒྲིག་བྱེད་མེད།

ཝ་ཤིན་ཀྲོན་ནས་ནེའུ་ཡོག་གི་བར་གྱི་གཞུང་ལམ་དུ་འཚང་ཀ་མེད་སྐབས་ཆུ་ཚོད་བཞི་ཙམ་ལས་མི་འགོར་ཡང་ཉིན་དེར་གཟའ་སྤེན་པ་ཡིན་པས་ལམ་བར་དུ་རླངས་འཁོར་གྱི་འཚང་ཁ་ཧ་ཅང་ཆེ། ཞོགས་པ་ཆུ་ཚོད་དགུ་ཙམ་ལ་ལམ་དུ་ཆས་ཀྱང་ཕྱི་དྲོ་ཆུ་ཚོད་བཞི་བ་ཙམ་ལ་གཞི་ནས་ནེའུ་ཡོག་གྲོང་ཁྱེར་དཀྱིལ་གྱི་དུས་ཀྱི་ཐང་ཆེན་དང་ཐག་ཉེ་བའི་་མགྲོན་ཁང་དེའི་སྒོ་མདུན་དུ་འབྱོར་ཐུབ་པ་བྱུང་། ཉིན་དེར་བསམ་བློ་བཏང་ན་གཞུང་ལམ་དུ་དེ་ཙམ་གྱི་མ་འགོར་ཡང་གྲོང་ཁྱེར་ནང་དུ་སླེབས་རྗེས་ལམ་མདོ་རེ་རེ་ནས་སྐར་མ་ཁ་ཤས་རེ་ལ་སྒུག་དགོས་བྱུང་བའི་སྐབས་དེའི་རྗེས་ལུས་ཐེབས་པའི་སེམས་འཚབ་དེ་ངོ་མ་བཤད་དཀའ་བའི་མནར་གཅོད་ཅིག་རེད།

ངའི་བཅར་འདྲི་བྱེད་སའི་བུད་མེད་དེའི་མིང་ལ་ཚེ་དབྱངས་ཟེར་ཞིང་། ནེའུ་ཡོག་ཏུ་ཡོད་པའི་སྐད་གྲགས་ཆེ་བའི་ཟ་ཁང་བདུན་གྱི་མ་རྩ་གཙོ་བོ་ཡོད་མཁན་ཞིག་ཡིན། ཁོ་མོ་རྒྱུན་དུ་བོད་ཀྱི་སྤྱི་ཚོགས་སུ་མཐོང་དཀོན་པོ་ཡོད་ལ་ཁོ་མོ་ངོ་ཤེས་མཁན་གྱི་བོད་མི་ཡང་ཉུང་ཉུང་ལས་མེད། ངས་ཀྱང་གྲོགས་པོ་ནང་མ་ཞིག་གི་གསང་ལམ་རྒྱུད་དེ་ཁོ་མོ་དང་ཁ་པར་ནས་འབྲེལ་བ་བྱུང་བ་ལས། དངོས་སུ་མཇལ་མ་མྱོང་མོད། གྲོགས་པོོ་ནང་མ་དེ་ཡིས་བརྗོད་ན་(མཁུར་ཚོས་དམར་པོ)ཡི་ནང་དུ་ཚེ་དབྱངས་ལགས་ལ་བཅར་འདྲི་བྱ་ཐུབ་ཚེ་བཟང་རབས་ཟེར་ལ། ཁོ་མོའི་མི་ཚེ་ནི་གློག་བརྙན་སྐད་གྲགས་ཅན་ཞིག་གི་འཁྲབ་གཞུང་ལས་ལྷག་པའི་མཚར་བོ་ཡོད་རབས་ཟེར།

ང་རང་ཐད་ཀར་ཚེ་དབྱངས་ལགས་ཀྱིས་ཁ་པར་ནས་འཕྲིན་ཐུང་སྐུར་ཡོད་པའི་མགྲོན་ཁང་དེའི་ནང་གི་ཁང་བའི་སྒོ་བྱང་བཙལ་ནས་སོང་ལ། མགྲོན་ཁང་དེ་ནི་ཕལ་ཆེར་སྐར་མ་ལྔ་ཅན་ཞེས་མི་རྣམས་ཀྱིས་ཚད་འཛིན་སའི་མགྲོན་ཁང་དེ་འདྲ་ཞིག་རེད། མགྲོན་བསུའི་ཐང་ཆེན་ནི་གཞི་རྒྱ་ཆེ་ལ་ཞབས་ཞུ་བ་རྣམས་ནི་ཆེད་ལས་ཀྱི་རྣམ་པ་མངོན་འདདུག ད་དུང་ང་ཚེ་དབྱངས་ཀྱི་སྤྲད་ཡོད་པའི་མགྲོན་ཁང་གི་ཐོག་བརྩེགས་༢༨ལ་གློག་སྒམ་ནས་བསྐྱོད་སྐབས། གློག་སྒམ་དེ་མགྲོན་ཁང་གི་དཀྱིལ་དུ་ཡོད་ཅིང་མགྲོན་ཁང་དེ་གློག་གི་སྐས་སྒམ་གྱི་མཐའ་རུ་མ་ཎི་འཁོར་ལོ་ལྟར་བཟོ་བསྐྲུན་བྱེད་འདུག

ང་ཚེ་དབྱངས་ཀྱི་སྒོ་མདུན་དུ་འབྱོར་མ་ཐག གློ་བུར་དུ་སེམས་སུ་དགའ་རོགས་ཞིག་ལ་ཐུག་དགོས་དུས་ཀྱི་དངངས་སྐྲག་དང་འཚེར་སྣང་ཆེ་ཡང་ཐུག་འདོད་ཀྱི་མདུན་པ་ཆེ་བའི་ཚོར་བ་ཞིག་བྱུང་བས། ག་ལེར་སྒོ་འགྲམ་གྱི་ཅོང་བརྡ་མནན་པ་ན། ཡུན་ཙམ་མགོར་རྗེས་སྒོ་ཕྱེ་བྱུང་། ཐོག་མར་ངས་མཐོང་བ་ནི་ཚེ་དབྱངས་ལགས་ཀྱི་ལྷམ་མགོ་རེད། ལྷམ་མགོ་ལྗང་ནག་འོད་འཁྱུག་འཁྱུག་ཅན་ཞིག་གྱོན་འདུག་ལ། དེ་ནས་མགོ་བོ་ཡར་བཀྱགས་པ་ན་ཁོ་མོའི་མཛེས་སྡུག་གིས་ང་ཡི་བླ་སྒུལ་འདྲ་བྱུང་ལ། བསམ་དབང་དྲན་དབང་མེད་པ་ལྟ་བུར་གྱུར། ངས་རང་གི་ཉིན་དེའི་རྣམ་འགྱུར་དྲན་ཡོང་ན་ད་ལྟ་ད་དུང་ཡང་ཁོང་རྒོད་ཤོར་འགྲོ་མོད། ཁོ་མོས་ལག་པ་གཅིག་གི་སྒོ་ལུང་ལ་འཇུས་ཤིང་ལག་པ་གཅིག་གིས་ང་རང་ནང་དུ་བསུས་བྱུང་། ཁོ་མོས་ང་ལ་(ལམ་བར་ནས་དཀའ་ལས་ཆེ་སོང་ངམ)ཞེས་དྲིས་པ་དང་ལག་འཇུ་བྱས་བྱུང་། ངས་གཞི་ནས་རང་ཉིད་ཆུ་ཚོད་གཅིག་ཙམ་གྱིས་རྗེས་ལུས་ཐེབས་པའི་ནོངས་འགྱོད་དེ་དྲན་ནས། (གཟའ་མཇུག་ཡིན་པས་རླངས་འཁོར་འཚང་ཁ་ངོ་མ་ཆེ་ཀི། ང་རང་ཆུ་ཚོད་གཅིག་ཙམ་གྱིས་རྗེས་ལུས་ཐེབས་སོང་བས་ངོ་མ་དགོངས་དག་ཞུ། )ཞེས་ལན་བཏབ་པ་ན། (བསམ་ཤེས་བྱ་ཐུབ་ལ། ངས་སྔོན་ནས་ཚོད་དཔག་ཀྱང་བྱེད་ཡོད། སྐྱོན་མེད། )ཅེས་བཤད་རྗེས་ང་ལ་འབོལ་གདན་དུ་སྡོད་པའི་ལག་བརྡ་བཏང་ཞིང་ཁཱོ་ཧྥེ་བཟོ་སའི་ཕྱོགས་སུ་འཁོར་ནས། ཁཱོ་ཧྥེ་འཐུང་དགོས་མིན་དྲིས་བྱུང་། ངས་ཀྱང་དགོས་པའི་ལན་བཏབ་པ་ཡིན། ཁོ་མོས་ཁཱོ་ཧྥེ་བཟོ་ཞོར། ཉིན་ཧྲིལ་བོར་ཁོ་མོར་ལས་འཆར་གང་ཡང་མེད་པ་བཟོས་ཤིང་ཐུག་འཕྲད་འདི་མགྲོན་ཁང་དུ་གོ་སྒྲིག་བྱེད་དོན་ཡང་ལྷིང་འཇགས་ཁུ་སུམ་གྱི་མགྲོན་ཁང་དུ་གཞན་གྱིས་བར་ཆད་གཏོང་མི་སྲིད་པ་སོགས་འགྲེལ་བརྗོད་བྱེད་སོང་། ཁོ་མོའི་སྐད་རྣམས་དབུས་སྐད་ཡིན་པ་གང་ཞིག་ལ་དབུས་པ་ལྷད་མེད་པ་ཞིག་མིན་པ་ཡང་སྐད་ཆའི་ཟ་ཟུར་ནས་མངོན་ཡོང་།

ཚེ་དབྱངས་ཀྱིས་བཤད་པ་ལྟར་མགྲོན་ཁང་དེ་ཧ་ཅང་ལྷིང་འཇགས་རེད་ལ། ཁང་མིག་རྣམས་ཀྱང་ཆེ་ཞིང་ནུབ་གླིང་གི་དུས་དེབ་སོགས་སུ་བཀོད་པའི་དེང་རབས་ཀྱི་ནང་ཆས་རྣམས་ལྟར་གྲལ་དག་ཅིང་བཟོ་དབྱིབས་མཛེས་པ། ཁྲ་ཁྲ་ཟིང་ཟིང་མེད་པར་བརྗིད་ཉམས་ལྡན་པ་ཞིག་རེད།

ཚེ་དབྱངས་ཀྱི་ཁཱོ་ཧྥེ་བཟོ་བའི་རིང་ལ་ངས་ཁོ་མོར་རྒྱབ་ཕྱོགས་ནས་ལྟ་སྐབས། ཕལ་ཆེར་ལོ་ན་༣༥ཡས་མས་ཙམ་ཞིག་རེད་ལ། ལྷམ་མགོ་ལྗང་ནག་དེ་ལས་གཞན་ལུས་ཧྲིལ་བོར་ནུབ་གླིང་གི་དེང་རབས་གྱོན་ཆས་ནག་པོ་ཞིག་གིས་གཡོག་འདུག་ལ་ངས་དོ་སྣང་བྱུང་བ་ལ་ཁོ་མོའི་སྐྲ་ལོ་རྣམས་ལྟག་མགོའི་མཐོ་སར་གཅིག་ཏུ་སྒྲིལ་འདུག་ལ་དངུལ་དང་བྱུ་རུའི་ཁྲ་ཅན་གྱི་སྐྲ་འཛར་གཅིག་གིས་བརྒྱན་འདུག ངའི་བསམ་བློའི་ནང་དུ་སྐྲ་འཛར་དེ་ལ་ངེས་པར་དུ་གཏམ་རྒྱུད་ཅིག་ཡོད་ངེས་པར་ངོས་འཛིན་བྱེད། སྐེད་ཚིགས་རིང་ཞིང་གཟུགས་གཞི་དྲང་ལ་དེ་ལས་ཀྱང་གཟུགས་པོའི་ཚོ་ཚད་དེ་གྲོང་ཁྱེར་བུད་མེད་ཚོས་ཉིན་མཚན་མེད་པར་ལུས་རྩལ་སྦྱང་ནས་སྐམ་རིད་ཀྱི་མདོག་མི་མངོན་པའི་གཟུགས་པོ་ཚད་ལྡན་དེ་ཚོ་དང་གཅིག་མཚུངས་རེད་འདུག

ཁོ་མོས་ང་ལ་ཁཱོ་ཧྥེ་བཏུང་སྣོད་ཁྱེར་ནས་མདུན་དུ་བཞག་རྗེས།ང་དང་ཁ་གཏད་དུ་འབོལ་གདན་སྟེང་བསྡད་བྱུང་། སྐབས་དེར་ངས་གཞི་ནས་སེམས་ལྷོད་ལ་བབ་ནས་ཚེ་དབྱངས་ཀྱི་ངོ་གདོང་ཧྲིལ་བོར་ཞིབ་ལྟ་ཞིག་བྱས་པཡིན།  ཁོ་མོའི་ངོ་གདོང་ལ་བྱུག་རྫས་ཁ་དོག་ཅན་གཅིག་ཀྱང་བྱུག་མི་འདུག་ལ་ཧ་ཅང་གིས་རང་བྱུང་ཡིན་པ་མ་ཟད། ངོ་གདོང་གི་སྐྱི་ལྤགས་ལ་བོད་ཡུལ་གྱི་བོད་མི་སྤྱི་ལྟར། ཉི་མར་ཐག་ཉེ་ཞིང་རླུང་ལ་བརྟེན་ནས་ལྤགས་པའི་ནང་དུ་ནག་ཐིགས་འགའ་རེ་ཡོད་པ་གསལ་བོར་མཐོང་ལ། མིག་གི་ཀྲིག་ཀ་ནི་ད་ལྟའི་དུས་ཚོད་ལ་ཀོ་རི་ཡ་དང་ཉི་ཧོང་གི་བུད་མེད་ཚོས་ཉེན་ཁར་མ་འཛེམས་པར་བཤག་བཅོས་ཀྱིས་བཟོ་བཞིན་པའི་ཀྲིག་ཀ་དེ་ཚོ་ལྟར་གསལ་ཞིང་ཆེ་ལ། མིག་གི་འོད་མདངས་ནི་བུད་མེད་གཞོན་ནུ་མ་ཞིག་གི་མིག་འོད་ལྟར་ཧ་ཅང་དྭངས། དེ་ལས་ཀྱང་ངོ་གདོང་གི་དབྱིབས་ནི་གོར་རྒྱུ་མེད་ལ་ནར་རྒྱུ་མེད་པ་ཞིག་རེད། ནུབ་ལྭ་ནག་པོ་དེ་ནི་སྐད་གྲགས་ཆེ་བའི་བཟོ་དབྱིབས་འཆར་འགོད་དང་གྱོོན་ཆས་ཀྱི་མིང་བྱང་ཆེ་བ་ཅན་ཞིག་ཡིན་པ་ང་རང་ཉིད་གྱོན་ཆས་ལ་དོ་སྣང་ཡོད་པ་ལས་ཤེས་བྱུང་ལ། གྱོན་པ་འདི་རིགས་མངོན་གསལ་དོད་པོའི་ཁྱད་པར་མེད་ཀྱང་བབ་ཆགས་པ་གང་ཞིག་ལ་བུད་མེད་ཀྱི་ལུས་ཀྱི་མཛེས་པ་དང་དབྱིབས་ཡོད་ཚད་ག་ལེར་གསལ་བོར་མཐོང་ཐུབ་པའི་རིགས་དེ་རེད།  ལཱ་བ་ནག་པོའི་ནང་གི་ཁོ་མོའི་སྐེད་དང་ངོ་གདོང་གི་ཤ་མདངས་ནི་བཅུད་ལྡན་བདེ་ཐང་གི་རྣམ་པ་མངོན་ཞིང་ཁ་མིག་གྲལ་འགྲིག་ཅིང་མཛེས་སྡུག་ཡིད་དབང་འཕྲོག་ཀྱང་། མཛེས་པ་ལྐོག་ཏུ་སྤས་ཏེ་ཆེས་སྤྱིར་བཏང་གི་རྣམ་པ་སྟོན་ཐབས་བྱེད་པའི་་གྱོན་ཆས་དང་རྣམ་འགྱུར་དེ་ཚོ་་ངོ་མ་ཡིད་དབང་འཕྲོག་པ་ཞིག་འདུག

ངས་ཁོ་མོའི་ངོ་གདོང་ལ་ཞིབ་ལྟ་བྱེད་བཞིན་པའི་སྐབས་སུ་ཁོ་མོ་ཅུང་དགོད་ཙམ་གྱི་སྐད་གདངས་ཀྱིས། གྲོགས་པོ་ནང་མ་དེ་ཡིས་བརྗོད་ན་ཁྱེད་མཛེས་མ་ཞིག་ཡོད་ཟེར་ནས་ཡང་ཡང་བཤད་མྱོང་བས། ལྟོས་ཡོང་ན་ཁོས་བཤད་པ་ནོར་མེད་ཀི་ཟེར། ང་རང་ཅུང་ངོ་ཚ་བའི་ཉམས་ཀྱིས། ཁོས་བཤད་ན་ཁྱོད་མཛེས་མ་ཡོད་ཟེར་མོད། ངས་ལྟོས་ན་ཁྱོད་མཛེས་མ་ཙམ་མ་རེད་འདུག ཁྱེད་ཀྱི་གྱོན་པ་སོགས་ལ་ལྟོས་ཡོང་ན་ཁྱེད་ལ་རང་གི་རང་གཤིས་ཡོད་པའི་མཛེས་མ་ཞིག་རེད་འདུག་ཅེས་བཤད་པ་ཡིན།

དེ་ནས་གཏམ་མགོ་གླེང་བ་ཡིན། ཚེ་དབྱངས་ལགས་ཨ་མེ་རི་ཀར་ག་དུས་ཡོང་བ་ཡིན་ན། ཞེས་དྲིས་བ་ན། ཚེ་དབྱངས་ཀྱིས་ད་ཁྱེད་ཀྱི་བཅར་འདྲི་མགོ་བཙུགས་པ་ཡིན་ནམ་ཟེར། ངས་འཛུམ་ཙམ་བྱས་པ་ཡིན།

སྐབས་དེར་ཚེ་དབྱངས་འབོལ་ལྡན་ལས་ཡར་ལངས་ཏེ་ཁང་བའི་ཕྱེད་ཀ་ཤེལ་སྒོ་ཡིན་པའི་ཕྱོགས་སུ་བསྐྱོད་ཞོར། ཤེལ་སྒོ་ལ་གདོང་གཏད་དེ། ང་ལ་གཏམ་རྒྱུད་འདི་འདྲ་ཞིག་བཤད་བྱུང་། (མུ་འགོད)

ཕ་ཡུལ་ལ་ཤ་མཆིན་བརླན་རོགས།

Published ཟླ་བརྒྱད་པ། 28, 2013 by Tsering kyi

༼སྙན་ངག་འདི་ལོ་ངོ་གསུམ་གྱི་རིང་གི་དྲ་གྲོགས་༢༠ལ་ཕུལ་བ་ཡིན། ཁོ་ཚོ་ནི་ཁམས་རྫོགས་ཆེན་དང་རྫ་ཆུའི་ཁ། མདོ་སྨད་བླ་བྲང་དང་མགོ་ལོག གྲོང་ཁྱེར་ཟི་ལིང་། ཨོ་སི་ཁྲེ་རི་ལི་ཡ། རྒྱ་གར་སོགས་གང་སར་ཁྱབ་པའི་རིགས་མཐུན་སྤུན་ཟླ་ཁག་ཅིག་ཡིན།༽

ཕ་ཡུལ་ལ་ཤ་མཆིན་བརླན་རོགས།

མིག་ཆུའི་གླེང་དགོས་བའི་ནམ་ཟླ་རེ་ཞིག་བརྗེད་པར་གྱིས་ཏེ
རང་ཉིད་ཀྱི་སེམས་ཁམས་ལ་འདི་འདྲ་བའི་བྱིལ་བྱིལ་ཐེངས་གཅིག་བྱེད་པ་ནི
ངས་རང་ཉིད་ལ་སེམས་གསོ་གཏོང་སྟངས་ཤིག་ཡིན་ངེས་ལ
ཕ་ཡུལ་སྔས་མགོ་བྱེད་ཅིང་
ཕ་ཡུལ་ལ་ཤ་མཆིན་བརླན་པའི་ཁྱེད་ཅག་ཡོད་པ་བསམ་ན།
ངས་ཀྱང་རང་གི་རྣམ་ཤེས་དང་བླ་སྲོག་ཕ་ཡུལ་ལ་བསྙེས་པའི་སྣང་བ་སྐྱིད་པོ་འདུག

བརྡ་འཕྲིན་གྱི་བར་སྣང་དུ
ང་ཚོའི་རྒོད་སྒྲ་དང་ཀུ་རེ་ད་དུང་ཡང་བྲག་ཅ་ལྟར་གྲགས་བཞིན་་པས
ངས་བར་ཐག་འདི་ལ་འཁང་ར་མེད་པར་རྣམ་ཤེས་ཀྱི་ལྷན་འཛོམས་འདི་ལ་གཅེས་ཤིང་སྐྱོང་གི་ཡོད

མཚམས་རེར་ངས་འུ་ཚོའི་རྒོད་སྒྲ་དང་མིག་ཆུ་སྙིང་གཏམ་ལ་བརྗེ་བའི་གོ་རིམ་ནས
ཁྱེད་ཚོའི་སྔ་ཕྱི་ལ་བསམ་བློ་ཡང་ཡང་གཏོང་དགོས་བྱུང་ལ
ཁྱེད་ཚོའི་གཉའ་ཤིང་གི་ལྕི་ཚད་ལ་རྒྱང་ལྟ་ཡིས་ཁུ་སུམ་སུམ་ངང་མཆི་མ་སེམས་སུ་འཁྱིལ་འགྲོ
ལན་རེར་ངས་ཁོར་ཡུག་དང་ལས་དོན་གྱི་གནོན་ཤུགས་ལས
མངོན་ལྐོག་མེད་པའི་ཁོང་ཁྲོ་དང་འཁང་ར་ཡང་ཁྱེད་ཚོར་ཤོར་འགྲོ
སེམས་ཀྱི་མྱོང་བ་དང་ཚོར་བ་སྙིང་བརྗེ་བོ་འདི་ཚོ་ཡང་འཚོ་བའི་གྲུབ་ཆ་གཞན་ཞིག་ཡིན་ངེས་ན
ངའི་འཚོ་བའི་རི་མོའི་ངོས་སུ་ཁྱེད་ཚོ་ཡང་འོད་ཀྱིས་གྲུབ་ཡོད་ན
འདི་ནི་ཆག་གྲུམ་ཤོར་བའི་ལོ་རྒྱུས་ཤིག་གི་ཟུར་ངོས་ཀྱི་ང་ཚོ་ཡིན

ཁྱེད་ཚོས་ང་ལ་ཡང་ཡང་དུ
ངའི་སེམས་ཀྱི་ཕ་ཡུལ་དང་མི་མང་བློས་བསླངས་བྱེད་ཅིང་
ཁྱེད་ཚོས་ཨ་མའི་བྱམས་བརྩེ་དང་ཨ་ཕའི་རུས་ཞེན་སོགས་ཡང་ཡང་དུ་གླེང་བཞིན་པས
ངས་ཀྱང་སེམས་དང་བསམ་པས་ཕ་ཡུལ་དྲན་ཀྱིན་ཡོད
འུ་ཚོ་ལོ་ངོ་འདི་དག་གི་རིང་ལ་མཉམ་དུ་ངུས་མྱོང་ལ
འུ་ཚོས་ཀུ་རེ་དང་རྒོད་སྒྲས་ལོ་ངོ་འདི་དག་བསུས་ཡོད།

འོ་བརྒྱལ་བཟོས་སོང་། ཕ་ཡུལ་ལ་ཤ་མཆིན་བརླན་པའི་ན་ཟླ་ཚོ
བཀའ་དྲིན་ཆེ་སོང་།
ཕ་ཡུལ་གྱི་ངོ་གདོང་དང་དྲི་ཞིམ་ཁྱེར་བའི་ན་ཟླ་ཚོ།

20130827-224829.jpg

མི་ཚེར་སྡུག་པ།

Published ཟླ་དང་པོ། 25, 2013 by Tsering kyi

   མི་ཚེར་སྡུག་པ།

རྨི་ལམ་དུ་མེ་སྟག་མཆེད་ཀྱིན་པ་ཞིག་རྨིས་པས

ཆར་བ་ཟམ་ཟིམ་ཞིག་བབས་ན་བསམ

གཉིད་ལས་སད་བྱུང་།

རྨི་ལམ་ངོགས་ཀྱི་མེ་སྟག་དེ་འཚོ་བའི་ངོགས་སུ་རིམ་བཞིན་ཇེ་ཆེར་གྱུར་བས

ང་ལ་དབང་བའི་གྲུ་ཁ་ཆུང་ཆུང་འདིར་་ངའི་བློ་སྙིང་ཡང་ཚིགས་སོང་།

ངས་སྐྱི་ལྤགས་མཛེས་པོ་དེའི་ནང་དུ་བློ་སྙིང་བོར་བ་བསམ་དུས

ངའི་སྐྲ་ལོ་དང་བ་སྤུ་ཡང་མེ་ཡིས་འཇོམས་ལ་ཁད་བྱེད་བྱུང་

ལག་ཟུང་བྲང་ལ་བཞག་ན་སྟོང་བ་རེད

ཚོར་བས་ནང་ཁོག་སྔོགས་ན་སྟོང་བ་རེད

མི་ལོ་༢༩ལ་ཕྱིར་མིག་ལྟ་དུས

རྨི་ལམ་ནི་ངས་ཡི་གེ་འདི་འབྲི་གྱིན་པའི་སྔ་རོལ་ཐམས་ཅད་རེད་ལ

ང་སྟོང་བར་གྱུར་བའི་ཡི་གེ་འདི་ཀློག་གིན་པའི་ཁྱེད་ཀྱི་འདས་སོང་ཚང་མ་རེད

རྨི་ལམ་ནི་མཛེས་པའི་རི་མོ་ཞིག་རེད་ལ

རྨི་ལམ་དེ་གས་ཆག་ཤོར་བའི་བུམ་པ་ཞིག་ཀྱང་རེད

རྨི་ལམ་ནི་འདས་སོང་གི་ཁ་སང་ཡོད་ཚད་རེད་ལ

རྨི་ལམ་ནི་མ་འོངས་པའི་མི་ཚེ་ཟེར་བ་དེ་ཡང་རེད

བློ་སྙིང་མེ་ཡིས་ཚིགས་ཏེ  བློ་སྙིང་ས་ལ་ལྷུང་བའི་མི་མང་པོ་ཞིག

མིག་ཆུའི་ཐིགས་པ་གཅིག་རེ་

མཆོད་མེ་རྐང་གཅིག་འབར་བའི་མེ་ལྕེ་རེ་ལ་བརྗེ་བཞིན

སྨྲེང་སེམས་རླུང་དང་ཆུ་ལ་སྐུར་ཐུབ་ན་བསམ་པ་ཚོས

རུས་ཐལ་སྤར་མོ་གང་རུམ་ནང་དུ་བཅུག་ཏེ

སྙིང་རླུང་དང་སྐྱོ་བའི་ནད་ཀྱིས་མནར་བ་བསམ་ན

རྨི་ལམ་དང་མི་ཚེ་ནི་བསླུ་བྲིད་ཅིག་སྟེ

ཤ་ཁྲག་གི་བརྩེ་དུང་ལ་ཀུ་རེ་སློང་མཁན་ཞིག་རེད

འདང་བརྩེ་ལ་ཞེན་ཆགས་དང་སྐྱོ་སེམས་སློང་མཁན་གྱི་འཚུབ་མ་ཡུན་གཅིག་རེད།

unnamed

བུད་མེད་ཀྱི་ལག་པ།

Published ཟླ་དང་པོ། 5, 2013 by Tsering kyi

ཉི་མ་དེར་ལས་ཀ་གྲོལ་རྗེས་ཧ་ཅང་གིས་ཐང་ཆད་ཅིང་། ནང་དུ་སླེབས་པ་དང་མཉམ་དུ་ཆུ་རྐྱལ་རྭ་བ་ནས་ཆུ་ནང་ལ་འཛུལ་ཏེ་བསྡད་པ་ཡིན། དགའ་རོགས་མེད་ལ་སྙིང་ཉེ་བའི་དགའ་ཁ་ཁྱེར་ཕྱོགས་ཀྱི་མི་ཚོ་དང་ཁ་བྲལ་ཏེ་ལོ་གཅིག་ཙམ་འགོར་སོང་་བས་ཅུང་ཁེར་རྐྱང་གི་སུན་སྣང་གི་རྒོད་པའི་དུས་ཤིག་དང་འཁེལ་ཡོད། སྐབས་འདིར་ངས་ཆུའི་ཁ་ལ་དབྱིངས་བྱེད་ཀྱི་ཆུ་རྐྱལ་ཡོ་ཆས་དེ་བེད་སྤྱོད་བཏང་ནས་ངོ་གདོང་གནམ་མཁར་གཏད་དེ། ངའི་དེ་རིང་གི་སེམས་ཁམས་འདི་སུ་ལ་བཤད་དགོས་མིན་གྱི་མི་ཞིག་ལ་བསམ་བློ་བཏང་བ་ཡིན།   བྲག་རོང་ལྟ་བུའི་ཁང་བརྩེགས་འདི་དག་གི་བར་དུ་ང་དང་མཉམ་དུ་སྨྱོ་ཧམ་སྨྱོ་གཏམ་གྱི་རྒོད་སྒྲ་བསྒྲགས་མཁན་ནི་ཨ་མེ་རི་ཀར་འབྱོར་ཏེ་ཉིན་ཤས་རྗེས་ནས་ངོ་ཤེས་པའི་མཱེ་ཁོ་ལིས་ཛ་ནཱ་ཡིན་ལ། མོ་ངོ་ཤེས་པ་ནས་རྒྱུན་ལྡན་གྱིས་ཕན་ཚུན་སྤྲོ་གསེང་དང་མཚན་ཚོགས་སོགས་སུ་མཉམ་དུ་བསྐྱོད་ཀྱིན་ཡོད། མོ་ནི་ཨ་མེ་རི་ཀའི་གཞུང་འབྲེལ་ལྷན་ཁང་ཞིག་གི་དྲུང་ཡིག་ཡིན་ལ། མོ་རང་ངོ་ཤེས་པ་དེ་ཡང་ལྟེ་དབང་གི་ཕྱི་དྲོ་ཞིག་ལ་རེད།

ང་རང་ཝ་ཤིན་ཀྲོན་གྲོང་ཁྱེར་མཐའ་རུ་བཞུར་གྱིན་པའི་ཆུ་བོ་དེའི་ཟམ་ཆེན་བརྒལ་ཏེ་ནང་དུ་བསྐྱོད་ཀྱིན་པའི་སྐབས། ལྕགས་རྟ་ཞོན་ནས་འགྲོ་མཁན་གྱི་བུད་མེད་ཅིག་ངའི་འཁྲིས་ནས་བསྡད་བྱུང་ལ། མོས་ང་ལ་རོགས་པ་ཞིག་བྱེད་ཐུབ་མིན་སྐད་ཆ་དྲིས་བྱུང་། ངས་དེ་མ་ཐག་མོ་ལ་རོགས་པ་གང་བྱ་དགོས་སམ་ཞེས་དྲིས་དུས། རྐང་པ་བཅུ་ལོག་ཤོར་ཏེ་ལྕགས་ལྟ་ཞོན་ཐུབ་ཀྱིན་མེད་ན་ཟམ་པའི་ཕར་ཕྱོགས་བར་དུ་ལྕག་རྟ་འདེེད་རོགས་ལབ་སོང་། ངས་ལྕགས་རྟ་འདེད་ཞོར་བུ་མོ་དེ་དང་མཉམ་དུ་སྐད་ཆ་ཡར་མར་མང་པོ་བཤད་དེ་ཡོང་རྗེས། ཁོ་མོས་བཤད་ན་མོའི་ཨ་མ་ནི་ཉི་ཧོང་བ་ཡིན་པ་དང་ཨ་ཕ་ནི་དབྱིན་ཇི་ཡིན་འདུག་ལ་མོ་རང་ཨ་མེ་རི་ཀར་འཚར་ལོངས་བྱུང་བ་ཡིན་ཟེར་ལ། ང་རང་བོད་པ་ཡིན་པ་ཤེས་དུས་མོས་ང་ལ་བོད་པའི་གནས་སྟངས་ནམ་རྒྱུན་གོ་གིན་ཡོད་རབས་དང་༧རྒྱལ་བ་རིན་པོ་ཆེ་མི་ཡག་པོ་ཡོད་རབས་བརྗོད་ཀྱིན་འདུག

སླར་ཡང་རྙེད་པ།

Published ཟླ་བཅུ་གཉིས། 11, 2012 by Tsering kyi

མེ་ལོང་གི་ངོས་གཅིག་ཆག་ཧྲལ་དུ་གྱུར་བས
གྲུ་ག་མི་འདྲ་བའི་ཤེལ་ཧྲུག་འགའ་ཡར་མར་ལ་འཐོར་འདུག་པ་དེ
སྦྲུལ་སྐུ་ཞིག་གིས་སྣང་མེད་དུ་རབ་གནས་བྱེད་ཤུལ་དང་མཚུངས
བརྩེ་བ་ཤོར་བའི་བུད་མེད་དེ་དད་པ་ཅན་ཞིག་གིས་ཕྱག་ནས་འཐུ་བ་བཞིན
གཟབ་ནན་དང་ཧམ་སེམས་ཀྱིས
ཤེལ་ཧྲུག་རྣམས་ཡར་སྒྲིག་བྱུང་
ཁོ་མོའི་ལག་ངོས་སུ་ཁྲག་གི་ཐིགས་པ་ཟགས་ཀྱིན་པ་ཡང་ཚོར་ཀྱིན་མི་འདུག

སེམས་ཀྱི་དཔེ་མཚོན་དེ་མེ་ལོང་ལ་སྦྱར་ཚེ
འཛུམ་དང་སྐྱོ་བ་སྟོན་སའི་མེ་ལོང་དེ་ཆག་ཤུལ་ནས
སེམས་པ་ཐང་ལ་ལྷུང་བའི་ལོ་ཟླའི་བར
རྨ་ཁ་ཤོར་བའི་སེམས་པ་དེ་མ་སྒུལ་བར་ཡུན་རིང་འགོར་སོང་
གལ་ཏེ་སྒུལ་བར་བྱུང་ཡང་ནན་ཏན་མིན་པའི་ཀུ་རེ་ཡིས་རྒྱ་ཡན་དུ་བཞག་པས
མེ་ལོང་དང་སེམས་པ་ཆག་པའི་གོ་རིམ་བར་དུ
ཁོ་མོས་ཁེར་རྐྱང་གི་མཛེས་པ་ཟེར་བའི་མིང་ཚིག་ཅིག་བཙན་གྱིས་བཙལ

ལོ་ཟླ་མང་པོ་མང་པོ་འདས་སོང་
མེ་ལོང་ནི་མཐོང་བ་ཡོད་ཚད་སྣང་བྱེད་དུ་རྩིས་མེད་བཏང་བ་ནས
ཁོ་མོར་གཞི་གྲུབ་ཀྱི་འཚོ་རྟེན་དང་མངའ་ཐང་རྒྱས
འོད་ཚོལ་གྱིས་གས་ཁ་ཤོར་སའི་ཕྱིར་མིག་རེ་འཕངས་པ་ལས
མནོ་བསམ་ཞིབ་མོ་ཞིག་ཀྱང་གཏོང་ཁོམ་མ་བྱིན་པས
སེམས་པ་མཐོང་སའི་མེ་ལོང་ཞིག་བསྐྱར་དུ་སྒྲིག་རྒྱུ་དེ་གཏིང་བརྗེད་དུ་བསྒྱུར

ཁོ་མོའི་སྐྲ་ལོ་དང་ཟུར་མིག་གིས་ཁྱེད་ལ་ཤོད་ངེས་པ་ནི
མེ་ལོང་གི་ཕག་ཏུ་སྐྱི་གཡའ་བའི་འགལ་འདུ་ཟེར་བ་ཞིག་ཡོད་པ་དེ་རེད
དུས་ཚོད་དང་ས་གནས་ནོར་ས་རུ
འགལ་འདུ་དང་གྱེས་འཛོམས་ཟེར་བར་ཆོས་ཉིད་ཀྱིས་མགོ་རྐང་སྒྲིག་དུས
ཁོ་མོས་ཁྱེད་ལ་ཁེར་རྐྱང་གི་མཛེས་པ་ནི་ལན་ཆགས་མེད་པའི་མན་ངག་ཅིག་ཏུ་ཤོད་ངེས

རྨས་པའི་སེམས་པ་དེ་འཁྱོར་བས་སྐྱོར་སྐྱོར་བའི་ཁ་སང་དེ་རིང་
ཆག་ཧྲལ་གྱིས་མེ་ལོང་བསྐྱར་དུ་སྒྲིག་པས
མེ་ལོང་གི་ནང་དུ་བསྐྱར་དུ་གདོང་རིས་ཤིག་མངོན་བྱུང་
གདོང་རིས་དེ་ཆག་རོ་སྒྲིག་པའི་གས་ཁ་ཡིས་གཡོ་བར་མི་བྱ་ལ
དབྱིབས་ཀྱང་འགུལ་བར་མི་བྱ་བས
ཁོ་མོས་ཀྱང་མེ་ལོང་ནང་གི་གདོང་རིས་དེའི་ཕག་ནས་རང་གི་སྐྲ་ལོ་མཐོང་བྱུང་
རང་གི་མིག་ཟུང་མཐོང་བྱུང་
རང་གི་སོ་ཕྲེང་མཐོང་བྱུང་